Yathā ca senaṅgaṃ patvā rājā nāma yattha yattha senā osīdati, taṃ taṃ ṭhānaṃ gacchati, tassa gatagataṭṭhāne senā paripūrati, parasenā bhijjitvā rājānameva anuvattati, evameva sahajātadhammānaṃ vikkhipituṃ vippakirituṃ appadānato samādhi avikkhepalakkhaṇo nāma hotī"ti.

@4 cha.Ma. yathā 5 cha.Ma. ayaṃ pāṭho na dissati 6 milinda.14/38

Aparo pana nayo:- ayaṃ cittassekaggatāsaṅkhāto samādhi nāma avisāraṇalakkhaṇo vā avikkhepalakkhaṇo vā, sahajātadhammānaṃ sampiṇḍanaraso nhāniyacuṇṇānaṃ udakaṃ viya. Upasamapaccupaṭṭhāno ñāṇapaccupaṭṭhāno vā. "samāhito yathābhūtaṃ pajānāti passatī"ti vuttaṃ. Visesato sukhapadaṭṭhāno. Nivāte dīpaccīnaṃ ṭhiti viya cetaso ṭhitīti daṭṭhabbo.