Indriyarāsivaṇṇanā

saddahanti etāya, sayaṃ vā saddahati, saddahanamattameva vā esāti saddhā, sāva assaddhiyassa abhibhavanato adhipatiyaṭṭhena indriyaṃ, adhimokkhalakkhaṇe vā indattaṃ kāretīti indriyaṃ, saddhāeva indriyaṃ saddhindriyaṃ. Sā panesā sampasādanalakkhaṇā ca saddhā pakkhandanalakkhaṇā ca.

Yathā hi rañño cakkavattissa udakappasādako maṇi udake pakkhitto paṅkasevālapaṇakakaddamaṃ sannisīdāpeti, udakaṃ acchaṃ karoti vippasannaṃ anāvilaṃ, evameva saddhā uppajjamānā nīvaraṇe vikkhambheti, kilese sannisīdāpeti, cittaṃ pasādeti, anāvilaṃ karoti, pasannena cittena yogāvacaro kulaputto dānaṃ deti, sīlaṃ samādiyati, uposathakammaṃ karoti, bhāvanaṃ ārabhati. Evaṃ tāva saddhā sampasādanalakkhaṇāti veditabbā. Tenāha āyasmā nāgaseno:-

yathā mahārāja rājā cakkavattī caturaṅginiyā senāya saddhiṃ addhānamaggap- paṭipanno parittaṃ udakaṃ tareyya, taṃ udakaṃ hatthīhi ca assehi ca rathehi ca pattīhi ca khubhitaṃ bhaveyya āvilaṃ luḷitaṃ kalalībhūtaṃ. Uttiṇṇo ca rājā cakkavattī manusse āṇāpeyya "pānīyaṃ bhaṇe āharatha, taṃ pivissāmī"ti. Rañño ca udakappasādako maṇi bhaveyya. "evaṃ devā"ti kho te manussā rañño cakkavattissa paṭisuṇitvā taṃ udakappasādakamaṇiṃ udake pakkhipeyyuṃ. Sahasā udake udake pakkhittamattena paṅkasevālapaṇakakaddamo ca sannisīdeyya, acchaṃ bhaveyya udakaṃ vippasannaṃ anāvilaṃ, tato rañño cakkavattissa pānīyaṃ upanāmeyyuṃ "pivatu devo pānīyan"ti.