Saranti etāya, sayaṃ vā sarati, saraṇamattameva vā esāti sati. Sā ca muṭṭhassaccassa avibhavanato adhipatiyaṭṭhena indriyaṃ, upaṭṭhānalakkhaṇe vā indattaṃ kāretīti indriyaṃ, satieva indriyaṃ satindriyaṃ. Sā panesā apilāpanalakkhaṇā ca sati upaggaṇhanalakkhaṇā ca. Yathā hi rañño bhaṇḍāgāriko dasavidhaṃ ratanaṃ gopayanto sāyaṃ pāto rājānaṃ issariyasampattiṃ sallakkhāpeti sāreti, evameva sati kusalakammaṃ sammā sallakkhāpeti sāreti. Tenāha thero:-

"yathā mahārāja rañño cakkavattissa bhaṇḍāgāriko rājānaṃ cakkavattiṃ sāyaṃ pāto issariyasampattiṃ sarāpeti `ettakā deva hatthī, ettakā assā, ettakā rathā, ettakā pattī, ettakaṃ hiraññaṃ, ettakaṃ suvaṇṇaṃ, ettakaṃ sabbaṃ sāpateyyaṃ, taṃ devo saratū'ti, evameva kho mahārāja sati kusaladhamme apilāpeti `ime cattāro satipaṭṭhānā, ime cattāro sammappadhānā, ime cattāro iddhipādā, imāni pañcindriyāni, imāni pañca balāni, ime satta bojjhaṅgā, ayaṃ ariyo aṭṭhaṅgiko maggo, ayaṃ

@4 cha.Ma. pātaṃ. evamuparipi 5 cha.Ma. ayaṃ pāṭho na dissati 6 cha.Ma. sarāpeti