@7 cha.Ma. yasaṃ Samatho, ayaṃ vipassanā, imāni ariyasaccāni, ayaṃ vijjā, ayaṃ vimutti, ime lokuttarā dhammāti. Evaṃ kho mahārāja apilāpanalakkhaṇā satī"ti.

Yathā pana rañño cakkavattissa pariṇāyakaratanaṃ rañño ahite ca hite ca ñatvā ahite apayāpeti, hite upayāpeti, evameva sati hitāhitānaṃ dhammānaṃ gatiyo samanvesitvā "ime kāyaduccaritādayo dhammā ahitā"ti ahite dhamme apanudeti, "ime kāyasucaritādayo dhammā hitā"ti hite dhamme upaggaṇhāti. Tenāha thero:-

"yathā mahārāja rañño cakkavattissa pariṇāyakaratanaṃ rañño hitāhite jānāti `ime rañño hitā, ime ahitā, ime upakārā, ime anūpakārā'ti. Tato ahite apanudeti, hite upaggaṇhāti, evameva kho mahārāja sati uppajjamānā hitāhitānaṃ dhammānaṃ gatiyo samanvesati `ime dhammā hitā, ime dhammā ahitā, ime dhammā upakārā, ime dhammā anūpakārā'ti. Tato ahite dhamme apanudeti, hite dhamme upaggaṇhāti, evaṃ kho mahārāja upaggaṇhanalakkhaṇā satī"ti.

Aparo nayo:- apilāpanalakkhaṇā sati, asammosanarasā, ārakkhapaccupaṭṭhānā visayābhimukhībhāvapaccupaṭṭhānā vā. Thirasaññāpadaṭṭhānā kāyādisatipaṭṭhānapadaṭṭhānā vā. Ārammaṇe daḷhaṃ patiṭṭhitattā pana esikā viya cakkhudvārādirakkhanato dovāriko viya ca daṭṭhabbā.