Tīhipi cetehi yathāpaṭipāṭiyā nekkhammasaññā abyāpādasaññā avihiṃsāsaññāti imā tisso saññā honti, asubhasaññā appamāṇasaññā dhātusaññāti imā ca tisso saññā honti. Alobhena pana kāmasukhallikānuyogantassa parivajjanaṃ, adosena attakilamathānuyogantassa parivajjanaṃ hoti, amohena majjhimāya paṭipattiyā paṭipajjanaṃ. Tathā alobhena abhijjhākāyaganthassa pabhedanaṃ hoti, adosena byāpādakāyaganthassa, amohena sesaganthadvayassa. Purimāni ca dve satipaṭṭhānāni purimānaṃ dvinnaṃ ānubhāvena, pacchimāni pacchimasseva ānubhāvena ijjhanti.

Alobho cettha ārogyassa paccayo hoti, aluddho hi lobhanīyampi asappāyaṃ na sevati, tena arogo hoti. Adoso yobbanassa, aduṭṭho hi valittacapalitāvahena dosagginā aḍayhamāno dīgharattaṃ yuvā hoti. Amoho dīghāyukatāya, amuḷho hi hitāhitaṃ ñatvā ahitaṃ parivajjamāno hitañca paṭisevamāno dīghāyuko hoti.

Alobho cettha bhogasampattiyā paccayo hoti, aluddhassa hi cāgena bhogapaṭilābho. Adoso mittasampattiyā aduṭṭhassa mettāya mittānaṃ paṭilābhato ceva aparihānato ca. Amoho attasampattiyā, amuḷho hi attano hitameva karonto attānaṃ sampādeti. Alobho ca dibbavihārassa paccayo hoti, adoso brahmavihārassa, amoho ariyavihārassa.

Alobhena cettha sakapakkhesu sattasaṅkhāresu nibbuto hoti tesaṃ vināsena abhisaṅgahetukassa dukkhassa abhāvā. Adosena parapakkhesu aduṭṭhassa verīsupi verisaññāya abhāvato. Amohena udāsīnapakkhesu amuḷhassa sabbābhisaṅgatāya abhāvato.