Tatridaṃ opammaṃ:- eko kira paṇḍito rājā rahogato cintesi "idaṃ rājakulasantakaṃ na yathā vā tathā vā khāditabbaṃ, sippānucchavikaṃ vetanaṃ vaḍḍhessāmī"ti. So sabbe sippake sannipātāpetvā "ekekasippajānanake pakkosathā"ti āha. Evaṃ pakkosiyamānā aṭṭhārasa janā uṭṭhahiṃsu, tesaṃ ekekaṃ paṭiviṃsaṃ dāpetvā vissajjesi. "dve dve sippāni jānantā āgacchantū"ti vutte pana satta janā āgacchiṃsu, tesaṃ dve dve paṭiviṃse dāpesi. "tīṇi sippāni jānantā āgacchantū"ti vutte ekova āgacchi, tassa tayo paṭiviṃse dāpesi. "cattāri sippāni jānantā āgacchantū"ti vutte dve janā āgamiṃsu, tesaṃ cattāro cattāro paṭiviṃse dāpesi. "pañca sippāni jānantā āgacchantū"ti vutte ekopi nāgacchi. "../../bdpicture/cha sippāni jānantā āgacchantū"ti vutte ekova āgacchi, tassa cha paṭiviṃse dāpesi. "satta sippāni jānantā āgacchantū"ti vutte ekova āgacchi, tassa satta paṭiviṃse dāpesi.

Tattha paṇḍito rājā viya anuttaro dhammarājā, sippajānanakā viya cittaṅgavasena uppannā dhammā, sippānucchavikaṃ vetanavaḍḍhanaṃ viya kiccavasena tesaṃ tesaṃ dhammānaṃ vibhattiāropanaṃ.

Sabbepi panete dhammā phassapañcakavasena jhānaṅgavasena indriyavasena maggaṅgavasena balavasena mūlavasena kammapathavasena lokapālavasena passaddhivasena lahutāvasena mudutāvasena kammaññatāvasena pāguññatāvasena ujukatāvasena satisampajaññavasena samathavipassanāvasena paggāhāvikkhepavasenāti sattarasa rāsayo hontīti.