[3] Yaṃ tasmiṃ samayeti ettha kiñcāpi "katamā tasmiṃ samaye vedanā hotī"ti āraddhaṃ, sātapadavasena pana "yan"ti vuttaṃ. Tajjāmanoviññāṇadhātusamphassajanti ettha tajjā vuccati tassa sātassa sukhassa anucchavikā sāruppā, anucchavikatthopi

@3 cha.Ma. manosilā binduṃ kareyyuṃ 4 Sī. evamevaṃ Hi ayaṃ tajjāsaddo hoti. Yathāha "tajjaṃ tassāruppaṃ kathaṃ mantetī"ti. Tehi vā rūpādīhi ārammaṇehi imassa ca sukhassa paccayehi jātātipi tajjā. Manoviññāṇameva nissattaṭṭhena dhātūti manoviññāṇadhātu. Samphassato jātaṃ, samphasse vā jātanti samphassajaṃ. Cittanissitattā cetasikaṃ. Madhuraṭṭhena sātaṃ. Idaṃ vuttaṃ hoti "yaṃ tasmiṃ samaye yathā vuttena atthena tajjāya manoviññāṇadhātuyā samphassajaṃ cetasikaṃ sātaṃ, ayaṃ tasmiṃ samaye vedanā hotī"ti. Evaṃ sabbapadehi saddhiṃ yojanā veditabbā.

Idāni cetasikaṃ sukhantiādīsu cetasikapadena kāyikasukhaṃ paṭikkhipati. Sukhapadena cetasikaṃ dukkhaṃ. Cetosamphassajanti cittasamphasse jātaṃ. Sātaṃ sukhaṃ vedayitanti sātaṃ vedayitaṃ, na asātaṃ vedayitaṃ. Sukhaṃ vedayitaṃ, na dukkhaṃ vedayitaṃ. Parato pana tīṇi padāni itthīliṅgavasena vuttāni. Sātā vedanā, na asātā. Sukhā vedanā, na dukkhāti ayameva panettha attho.