Pañcasīlaṃ vā aṭṭhasīlaṃ vā dasasīlaṃ vā samādiyantassa "pabbajissāmī"ti vihāraṃ gacchantassa pabbajantassa manorathaṃ matthakaṃ pāpetvā "pabbajito vatamhi sādhu sādhū"ti āvajjentassa pāṭimokkhaṃ saṃvarantassa cīvarādayo paccaye paccavekkhantassa āpāthagatesu rūpādīsu cakkhudvārādīni saṃvarantassa ājīvaṃ sodhentassa ca pavattā cetanā sīlamayaṃ puññakiriyāvatthu nāma.

Paṭisambhidāyaṃ vuttena vipassanāmaggena cakkhuṃ aniccato dukkhato anattato bhāventassa sotaṃ .pe. Manaṃ rūpe .pe. Dhamme cakkhuviññāṇaṃ .pe. Manoviññāṇaṃ cakkhusamphassaṃ .pe. Manosamphassaṃ cakkhusamphassajaṃ vedanaṃ .pe. Manosamphassajaṃ vedanaṃ rūpasaññaṃ .pe. Jarāmaraṇaṃ .pe. Aniccato dukkhato anattato bhāventassa pavattā cetanā, aṭṭhatiṃsāya vā ārammaṇesu appanaṃ appattā sabbāpi cetanā bhāvanāmayaṃ puññakiriyāvatthu nāma.

Mahallakaṃ pana disvā paccuggamanapattacīvarapaṭiggahaṇaabhivādanamaggasampadānādivasena apacitisahagataṃ veditabbaṃ.

Vuḍḍhatarānaṃ vattapaṭivattakaraṇavasena gāmaṃ piṇḍāya paviṭṭhaṃ bhikkhuṃ disvā pattaṃ gahetvā gāme bhikkhaṃ samādapetvā upasaṃharaṇavasena "gaccha, bhikkhūnaṃ pattaṃ āharā"ti sutvā vegena gantvā pattāharaṇādivasena ca kāyaveyyāvaṭikakāle veyyāvaccasahagataṃ veditabbaṃ.