Eko "evaṃ maṃ `dhammakathiko'ti jānissantī"ti icchāya ṭhatvā lābhagaruko hutvā deseti, taṃ na mahapphalaṃ hoti. Eko attano paguṇaṃ dhammaṃ apaccāsiṃsamāno vimuttāyatanasīsena paresaṃ deseti, idaṃ desanāmayaṃ puññakiriyāvatthu nāma.

Eko suṇanto "iti maṃ `saddho'ti jānissantī"ti suṇāti, taṃ na mahapphalaṃ. Eko "evaṃ me mahapphalaṃ bhavissatī"ti hitapharaṇena muducittena dhammaṃ suṇāti, idaṃ savanamayaṃ puññakiriyāvatthu nāma.

Diṭṭhiṃ ujuṃ karontassa diṭṭhujukammapuññakiriyāvatthu nāma. Dīghabhāṇakā panāhu "diṭṭhujukammaṃ sabbesaṃ niyamalakkhaṇaṃ. Yaṅkiñci puññaṃ karontassa hi diṭṭhiyā ujukabhāveneva mahapphalaṃ hotī"ti.

Etesu pana puññakiriyāvatthūsu dānamayaṃ tāva "dānaṃ dassāmī"ti cintentassa uppajjati, dānaṃ dadato uppajjati, "dinnamme"ti paccavekkhantassa uppajjati. Evaṃ pubbacetanaṃ muñcanacetanaṃ aparacetananti tissopi cetanā ekato katvā dānamayaṃ puññakiriyāvatthu nāma hoti. Sīlamayampi "sīlaṃ pūressāmī"ti cintentassa uppajjati, sīlapūraṇakāle uppajjati, "pūritamme"ti paccavekkhantassa uppajjati. Tā sabbāpi ekato katvā sīlamayaṃ puññakiriyāvatthu nāma hoti .pe. Diṭṭhujukammampi "diṭṭhiṃ ujukaṃ karissāmī"ti cintentassa uppajjati, diṭṭhiṃ ujukaṃ karontassa uppajjati, "diṭṭhi me ujukā katā"ti paccavekkhantassa uppajjati. Tā sabbāpi ekato katvā diṭṭhujukammaṃ puññakiriyāvatthu nāma hoti.