[375] Niddesavāre cittekaggatāniddese tāva saṇṭhiti avaṭṭhitīti idaṃ dvayaṃ ṭhitivevacanameva. Yaṃ pana kusalaniddese "ārammaṇaṃ ogāhetvā anupavisitvā tiṭṭhatīti avaṭṭhitī"ti vuttaṃ, taṃ idha na labbhati. Akusalasmiṃ hi dubbalā cittekaggatāti heṭṭhā dīpitameva. Idaṃ dvayaṃ.

"uddhaccavicikicchāvasena pavattassa visāhārassa paṭipakkhato avisāhāro"ti evarūpopi attho idha na labbhati. Sahajātadhamme pana na visāharatīti avisāhāro. Na vikkhipatīti avikkhePo. Akusalacittekaggatāvasena avisāhaṭassa mānasassa bhāvo avisāhaṭamānasatā. Sahajātadhammesu na kampatīti samādhibalaṃ. Ayāthāvasamādhānato micchāsamādhīti evamidha attho daṭṭhabbo.

[376] Viriyindriyaniddese yo heṭṭhā "nikkamo ceso kāmānaṃ panudanāyā"tiādi nayo vutto, so idha na labbhati. Sahajātadhammesu akampanaṭṭheneva viriyabalaṃ veditabbaṃ.