Byāpajjati tena cittaṃ pūtibhāvaṃ upagacchati, byāpādayati vā vinayācārarūpasampattihitasukhādīnīti byāpādo, atthato panesa dosoyeva. Idha pana paṭipāṭiyā ekūnatiṃsa padāni honti, aggahitaggahaṇena cuddasa. Tesaṃ vasena savibhattikāvibhattikarāsippabhedo veditabbo.

Yevāpanakesu chandādhimokkhamanasikārauddhaccāni niyatāni. Issāmacchariyakukkuccesu pana aññatarena saddhiṃ pañca pañca hutvāpi uppajjanti. Evaṃ imepi tayo dhammā aniyatayevāpanakā nāma. Tesu issatīti issā, sā parasampattīnaṃ ussūyanalakkhaṇā, tattheva anabhiratirasā, tato vimukhabhāvapaccupaṭṭhānā, parasampattipadaṭṭhānā, saññojananti daṭṭhabbā. Maccherassa bhāvo macchariyaṃ, taṃ laddhānaṃ vā labhitabbānaṃ vā attano sampattīnaṃ nigūhaṇalakkhaṇaṃ, tāsaṃyeva parehi sādhāraṇabhāvaakkhamanarasaṃ, saṅkocanapaccupaṭṭhānaṃ kaṭukañcukatāpaccupaṭṭhānaṃ vā, attano sampattipadaṭṭhānaṃ, cetaso virūpabhāvoti daṭṭhabbaṃ. Kucchitaṃ kataṃ kukataṃ, tassa bhāvo kukkuccaṃ, taṃ pacchānutāpanalakkhaṇaṃ, katākatānusocanarasaṃ, vippaṭisārapaccupaṭṭhānaṃ, katākatapadaṭṭhānaṃ, dāsabyaṃ viya daṭṭhabbaṃ. Ayaṃ tāva uddesavāre viseso.

[415] Niddesavāre vedanāniddese asātaṃ sātapaṭipakkhavasena veditabbaṃ.