Idhāpi padapaṭipāṭiyā ekūnatiṃsa aggahitaggahaṇena ca cuddaseva padāni honti. Yevāpanakesu pana thīnamiddhampi labbhati. Tasmā ettha vinā issāmacchariyakukkuccehi cattāri apaṇṇakaṅgāni thīnamiddhanti ime cha, issādīnaṃ uppattikāle tesu aññatarena saddhiṃ satta yevāpanakā ekakkhaṇe uppajjanti. Sesaṃ sabbaṃ sabbavāresu navamasadisameva. Imesu pana dvīsu domanassacittesu sahajātādhipatiyeva labbhati, no ārammaṇādhipati. Na hi kuddho kiñci garuṃ karotīti.

Dasamacittaṃ niṭṭhitaṃ.

Ekādasamacittavaṇṇanā

[422] Ekādasamaṃ chasu ārammaṇesu vedanāvasena majjhattassa kaṅkhāpavattikāle uppajjati. Tassa samayavavaṭṭhāne vicikicchāsampayuttanti padaṃ apubbaṃ. Tassattho vicikicchāya sampayuttanti vicikicchāsampayuttaṃ. Dhammuddese vicikicchā hotīti padameva viseso. Tattha vigatā cikicchāti vicikicchā. Sabhāvaṃ vā vicinanto etāya kicchati kilamatīti vicikicchā, sā saṃsayalakkhaṇā, kampanarasā, anicchayapaccupaṭṭhānā anekaṃ sagāhapaccupaṭṭhānā vā, ayonisomanasikārapadaṭṭhānā, paṭipattiantarāyakarāti daṭṭhabbā.