Sace pana balavārammaṇaṃ āpāthagataṃ hoti, kiriyāmanodhātuyā bhavaṅge āvaṭṭite cakkhuviññāṇādīni uppajjanti. Javanaṭṭhāne pana paṭhamakāmāvacarakusalacittaṃ javanaṃ hutvā cha satta vāre javitvā tadārammaṇassa vāraṃ deti. Tadārammaṇaṃ patiṭṭhamānaṃ taṃsadisameva mahāvipākacittaṃ patiṭṭhāti. Idaṃ dve nāmāni labhati paṭisandhicittasadisattā mūlabhavaṅganti ca, yaṃ javanena gahitaṃ ārammaṇaṃ, tassa gahitattā tadārammaṇanti ca. Imasmiṃ ṭhāne cakkhuviññāṇaṃ sampaṭicchannaṃ santīraṇaṃ tadārammaṇanti cattāri vipākacittāni gaṇanūpagāni honti.

Yadā pana dutiyaṃ kusalacittaṃ javanaṃ hoti, tadā taṃsadisaṃ dutiyaṃ vipākacittameva tadārammaṇaṃ hutvā patiṭṭhāti, idampi dve nāmāni labhati paṭisandhicittena asadisattā āgantukabhavaṅganti ca, purimanayeneva tadārammaṇanti ca. Iminā saddhiṃ purimāni cattāri pañca honti.

Yadā pana tatiyaṃ kusalacittaṃ javanaṃ hoti, tadā taṃsadisaṃ tatiyaṃ vipākacittaṃ tadārammaṇaṃ hutvā patiṭṭhāti. Idampi vuttanayeneva āgantukabhavaṅgaṃ, tadārammaṇanti ca dve nāmāni labhati. Iminā saddhiṃ purimāni pañca cha honti.

Yadā pana catutthaṃ kusalacittaṃ javanaṃ hoti, tadā taṃsadisaṃ catutthaṃ vipākacittaṃ tadārammaṇaṃ hutvā patiṭṭhāti. Idampi vuttanayeneva āgantukabhavaṅgaṃ, tadārammaṇanti ca dve nāmāni labhati. Iminā saddhiṃ purimāni cha satta honti.