[635] Kāyaviññattiniddese kāyaviññattīti ettha tāva kāyena attano bhāvaṃ viññāpentānaṃ tiracchānehipi purisānaṃ purisehi vā tiracchānānampi kāyagahaṇānusārena gahitāya etāya bhāvo viññāyatīti viññatti. Sayaṃ kāyagahaṇānusārena viññāyatītipi viññatti. "kāyena saṃvaro sādhū"tiādīsu āgato copanasaṅkhāto kāyoeva viññatti kāyaviññatti. Kāyavipphandanena adhippāyaviññāpanahetuttā, sayañca tathā viññeyyattā kāyena viññattītipi kāyaviññatti.

Kusalacittassa vātiādīsu aṭṭhahi kāmāvacarehi, abhiññācittena cāti navahi cittehi kusalacittassa vā dvādasahipi akusalacittehi akusalacittassa vā aṭṭhahi mahākiriyāhi dvīhi ahetukakiriyāhi abhiññāpattāya ekāya rūpāvacarakiriyāyāti ekādasahi kiriyācittehi abyākatacittassa vā. Ito aññāni hi cittāni viññattiṃ na janenti, sekkhāsekkhaputhujjanānaṃ pana ettakeheva cittehi viññatti hotīti etesaṃ kusalādīnaṃ vasena tīhi padehi hetuto dassitā.

Idāni chahi padehi phalato dassetuṃ "abhikkamantassa vā"tiādi vuttaṃ. Abhikkamādayo hi viññattivasena pavattattā viññattiphalannāma. Tattha abhikkamantassāti purato kāyaṃ abhiharantassa, paṭikkamantassāti pacchato paccāharantassa. Ālokentassāti ujukaṃ pekkhantassa. Vilokentassāti ito cito ca pekkhantassa. Sammiñjentassāti sandhiyo saṅkocentassa. Pasārentassāti sandhiyo paṭipaṇāmentassa.