Upādinnaniddese tāva cakkhāyatanādīni ekantaṃ upādinnattā vuttāni. Yasmā pana rūpāyatanādīni upādinnānipi atthi anupādinnānipi, tasmā tāni "yaṃ yaṃ vā panā"ti saṅkhepato dassetvā puna "kammassa katattā rūpāyatanan"ti- ādinā nayena vitthāritāni. Iminā upāyena sabbayevāpanakesu attho veditabbo.

Kasmā pana "kammassa katattā"ti ca "na kammassa katattā"ti ca ubhinnampi niddese jaratā ca aniccatā ca na gahitā, anupādinnādīnaṃyeva niddesesu gahitāti? "na kammassa katattā"ti ettha tāva kammato aññapaccayasamuṭṭhānaṃ saṅgahitaṃ, "kammassa katattā"ti ettha kammasamuṭṭhānameva, imāni ca dve rūpāni neva kammato, na aññasmā rūpajanakapaccayā uppajjanti, tasmā na gahitāni. Sā ca nesaṃ anuppatti parato āvībhavissati. Anupādinnanti- ādīsu pana kevalaṃ anupādinnādiggahaṇena kammādisamuṭṭhānatā paṭikkhittā, na aññapaccayasamuṭṭhānatā anuññātā. Tasmā tattha gahitānīti veditabbānīti.

[666] Cittasamuṭṭhānaniddese "kāyaviññatti vacīviññattī"ti idaṃ dvayaṃ yasmā ekantacittasamuṭṭhānāni bhūtāni upādāya paññāyati, tasmā vuttaṃ.