Puthūnaṃ jananādīhi kāraṇehi puthujjano

puthujjanantogadhattā puthu vāyaṃ jano iti.

So hi puthūnaṃ nānappakārānaṃ kilesādīnaṃ jananādīhi kāraṇehi puthujjano. Yathāha:- "puthū kilese janetīti puthujjano, puthū avihatasakkāyadiṭṭhikāti puthujjanā, puthū nānāsatthārānaṃ mukhamullokikāti puthujjanā, puthū sabbagatīhi avuṭṭhitāti puthujjanā, puthū nānābhisaṅkhāre abhisaṅkharontīti puthujjanā, puthū nānāoghehi vuyhantīti puthujjanā, puthū nānāsantāpehi santappantīti puthujjanā, puthū nānāpariḷāhehi paridayhantīti puthujjanā, puthū pañcasu kāmaguṇesu rattā giddhā gadhitā mucchitā ajjhāpannā laggā laggitā palibuddhāti puthujjanā, puthū pañcahi nīvaraṇehi āvutā nivutā ophutā pihitā paṭicchannā paṭikujjhitāti puthujjanā"ti. Puthūnaṃ vā gaṇanapathamatītānaṃ ariyadhammaparammukhānaṃ nīcadhammasamācārānaṃ janānaṃ antogadhattāpi puthujjanā, puthu vā ayaṃ, visuṃyeva saṅkhyaṃ gato, visaṃsaṭṭho sīlasutādiguṇayuttehi ariyehi janotipi puthujjano. Evametehi "assutavā puthujjano"ti dvīhi padehi ye te:-

"duve puthujjanā vuttā buddhenādiccabandhunā