[1065] Lobhaniddesepi heṭṭhā anāgatānaṃ padānaṃ ayamattho, rañjanavasena rāgo. Balavarañjanaṭṭhena sārāgo. Visayesu sattānaṃ anunayanato anunayo. Anurujjhatīti anurodho, kāmetīti attho. Yattha katthaci bhave sattā etāya nandanti, sayaṃ vā nandatīti nandī. Nandī ca sā rañjanaṭṭhena rāgo cāti nandīrāgo. Tattha ekasmiṃ ārammaṇe sakiṃ uppannā taṇhā nandī, punappunaṃ uppajjantī nandīrāgoti vuccati. Cittassa sārāgoti yo heṭṭhā balavarañjanaṭṭhena "sārāgo"ti vutto, so na sattassa, cittasseva sārāgoti attho.

Icchanti etāya ārammaṇānīti icchā. Balavakilesabhāvena mucchanti etāya pāṇinoti mucchā. Gilitvā pariniṭṭhapetvā gahaṇavasena ajjhosānaṃ. Iminā sattā gijjhanti gedhaṃ āpajjantīti gedho. Bahalaṭṭhena vā gedho. "gedhaṃ vā pavanasaṇḍan"ti hi bahalaṭṭheneva vuttaṃ. Anantarapadaṃ upasaggavasena vaḍḍhitaṃ. Sabbato bhāgena vā gedhoti paligedho. Sajjanti etenāti saṅgo, sagganaṭṭhena vā saṅgo. Osīdanaṭṭhena vā paṅko. Ākaḍḍhanavasena ejā, "ejā imaṃ purisaṃ. Parikaḍḍhati tassa tasseva bhavassa abhinibbattiyā"ti hi vuttaṃ. Vañcanaṭṭhena māyā. Vaṭṭasmiṃ sattānaṃ jananaṭṭhena janikā, "taṇhā janeti purisaṃ, cittamassa vidhāvatī"ti hi vuttaṃ. Vaṭṭasmiṃ satte dukkhena saññojayamānā janetīti sañjananī, ghaṭṭanaṭṭhena sibbatīti sibbinī, ayaṃ hi vaṭṭasmiṃ satte cutipaṭisandhivasena sibbati ghaṭṭeti. Tunnakāro viya pilotikāya pilotikaṃ, tasmā ghaṭṭanaṭṭhena "sibbinī"ti vuttā. Anekappakāraṃ visayajālaṃ, taṇhā vipphanditanivesasaṅkhātaṃ vā jālamassā atthīti jālinī.

@4 ka. gedhā 5 Sī. gedhaṃ vā pana vanasaṇḍaṃ 6 cha.Ma. sañjanti