Vajirassa pana pāsāṇo vā maṇi vā abhijjo nāma natthi. Yattha patati, taṃ vinividdhameva hoti. Vajiraṃ khepentaṃ asesetvā khepeti. Vajirena gatamaggo nāma puna pākatiko na hoti. Evameva arahattamaggassa avajjhakileso nāma natthi, sabbakilese vinivijjhati, vajiraṃ viya arahattamaggopi kilese khepento asesetvā khepeti. Vajirena gatamaggassa puna pākatikattābhāvo viya arahattamaggena pahīnakilesānaṃ puna paccudāvattanaṃ nāma natthīti.

[1307] Bāladukaniddese bālesu ahirikānottappāni pākaṭāni mūlāni ca sesānaṃ bāladhammānaṃ. Ahirikopi anottappī ca na kiñci akusalaṃ na karoti nāmāti etāni dve paṭhamaṃyeva visuṃ vuttāni. Sukkapakkhepi ayameva nayo, tathā kaṇhaduke.

[1311] Tapanīyadukaniddese katattā ca akatattā ca tapanaṃ veditabbaṃ. Kāyaduccaritādīni hi katattā tapanti, kāyasucaritādīni akatattā. Tathā hi puggalo "kataṃ me kāyaduccaritan"ti tappati, "akataṃ me kāyasucaritan"ti tappati. "kataṃ me vacīduccaritan"ti tappati .pe. "akataṃ me manosucaritan"ti tappati. Atapanīyepi eseva nayo. Kalyāṇakārī hi puggalo "kataṃ me kāyasucaritan"ti na tappati, "akataṃ me kāyaduccaritan"ti na tappati, "kataṃ me vacīsucaritan"ti na tappati .pe. "akataṃ me manoduccaritan"ti na tappatīti.

[1313] Adhivacanadukaniddese yā tesaṃ tesaṃ dhammānanti sabbadhammasaṅgahaṇaṃ. Saṅkhāyatīti saṅkhā, saṅkathiyatīti attho. Kinti saṅkathiyati? "ahan"ti "maman"ti "paro"ti "parassā"ti "satto"ti "bhāvo"ti "poso"ti "puggalo"ti "naro"ti "māṇavo"ti "tisso"ti "datto"ti "mañco pīṭhaṃ bhisi bimbohanaṃ vihāro pariveṇaṃ dvāraṃ vātapānan"ti, evaṃ anekehi ākārehi saṅkathiyatīti saṅkhā, sammā ñāyatīti samaññā. Kinti samaññāyati? "ahan"ti "maman"ti .pe. "dvāraṃ vātapānan"ti sammā ñāyatīti samaññā. Paññāpiyatīti paññatti. Vohariyatīti vohāro. Kinti vohariyati? "ahan"ti "maman"ti .pe. "dvāraṃ Vātapānan"ti vohariyatīti vohāro.