[1340] Aṭṭhārasannaṃ dhātūnaṃ uggahaṇamanasikārasavanadhāraṇaparicchedajānanakapaññā dhātukusalatā nāma. Tāsaṃyeva uggahaṇamanasikārajānanakapaññā manasikārakusalatā nāma.

[1342] Dvādasannaṃ āyatanānaṃ uggahaṇamanasikārasavanadhāraṇaparicchedajānanakapaññā āyatanakusalatā nāma. Tīsupi vā etāsu kusalatāsu uggaho manasikāro savanaṃ sammasanaṃ paṭivedho paccavekkhaṇāti sabbaṃ vaṭṭati. Tattha savanauggahapaccavekkhaṇā lokiyā, paṭivedho lokuttaro, sammasanamanasikārā lokiyalokuttaramissakā. "avijjāpaccayā saṅkhārā"tiādīni paṭiccasamuppādavibhaṅge āvībhavissanti. Iminā pana paccayena idaṃ hotīti jānanakapaññā paṭiccasamuppādakusalatā nāma.

[1344] Ṭhānāṭṭhānadukaniddese hetū paccayāti ubhayampetaṃ aññamaññavevacanaṃ. Cakkhuppasādo hi rūpaṃ ārammaṇaṃ katvā uppajjanakassa cakkhuviññāṇassa hetu ceva paccayo ca. Tathā sotappasādādayo sotaviññāṇādīnaṃ, ambabījādīni ca ambaphalādīnaṃ. Dutiyanaye ye ye dhammāti visabhāgapaccayadhammānaṃ nidassanaṃ. Yesaṃ yesanti visabhāgapaccayasamuppannadhammanidassanaṃ. Na hetū na paccayāti cakkhuppasādo saddaṃ ārammaṇaṃ katvā uppajjanakassa sotaviññāṇassa na hetupaccayo. Tathā sotappasādādayo avasesaviññāṇānaṃ. Ambādayo ca tālādīnaṃ uppattiyāti evamattho veditabbo.