@2 cha.Ma. piṇḍarasabhojanādīni paṇītabhojanāni 3 Sī.,Ma. aṅgulaṭṭhi, cha. aṅgalaṭṭhi

@4 cha.Ma. nibbuddhamallamuṭṭhikamallādayo 5 cha.Ma. sarīramaṃsaṃ Vihiṃsūparatiyāti vihiṃsā nāma abhuttapaccayā uppajjanakakhuddā tassā uparatiyā vūpasamatthāya āhāreti. Brahmacariyānuggahāyāti brahmacariyaṃ nāma tisso sikkhā sakalaṃ sāsanaṃ tassa anuggaṇhanatthāya āhāreti.

Itīti upāyanidassanaṃ, iminā upāyenāti attho. Purāṇañca vedanaṃ paṭihaṅkhāmīti purāṇavedanā nāma abhuttapaccayā uppajjanakavedanā, taṃ paṭihanissāmīti āhāreti. Navañca vedanaṃ na uppādessāmīti navavedanā nāma abhuttapaccayena uppajjanakavedanā, taṃ na uppādessāmīti āhāreti. Athavā navavedanā nāma bhuttapaccayena uppajjanakavedanā, tassā anuppannāya anuppajjanatthameva āhāreti. Yātrā ca me bhavissatīti yāpanā ca me bhavissati. Anavajjatā cāti ettha atthi sāvajjaṃ, atthi anavajjaṃ. Tattha adhammikapariyesanā adhammikapaṭiggahaṇaṃ adhammena paribhogoti idaṃ sāvajjaṃ nāma. Dhammena pariyesitvā dhammena paṭiggahetvā paccavekkhitvā paribhuñjanaṃ idaṃ anavajjaṃ nāma. Ekacco anavajjeyeva sāvajjaṃ karoti, "laddhaṃ me"ti katvā pamāṇātikkantaṃ bhuñjati, taṃ taṃ jirāpetuṃ asakkonto uddhaṃvirecanaadhovirecanādīhi kilamati, sakalavihāre bhikkhū tassa sarīrapaṭijagganabhesajjapariyesanādīsu ussukkaṃ āpajjanti, "kiṃ idan"ti vutte "asukassa nāma udaraṃ uddhumātan"tiādīni vadanti, "esa niccakālampi evaṃ pakatikoyeva, attano kucchippamāṇaṃ nāma na jānātī"ti nindanti garahanti. Ayaṃ anavajjeyeva sāvajjaṃ karoti nāma. Evaṃ akatvā "anavajjatā ca bhavissatī"ti āhāreti.