Dukaatthuddhāravaṇṇanā

[1441] Hetugocchakaniddese "tayo kusalahetū"tiādinā nayena hetū dassetvā puna teyeva uppattiṭṭhānato dassetuṃ "catūsu bhūmīsu kusalesu uppajjantī"tiādi vuttaṃ. Iminā upāyena sesagocchakesupi desanānayo veditabbo.

[1473] Yattha dve tayo āsavā ekato uppajjantīti ettha tividhena āsavānaṃ ekato uppatti veditabbā, tattha catūsu diṭṭhivippayuttesu avijjāsavena, diṭṭhisampayuttesu diṭṭhāsavaavijjāsavehi saddhinti kāmāsavo duvidhena ekato uppajjati. Bhavāsavo catūsu diṭṭhivippayuttesu avijjāsavena saddhinti ekadhāva ekato uppajjati.

[1485] Yathā cettha, evaṃ "yattha dve tīṇi saññojanāni ekato uppajjantī"ti etthāpi saññojanānaṃ uppatti ekato dasadhā bhave. Tattha kāmarāgo catudhā ekato uppajjati. Paṭigho tidhā, māno ekadhā, tathā vicikicchā ceva bhavarāgo ca. Kathaṃ? kāmarāgo tāva mānasaññojanaavijjāsaññojanehi ceva diṭṭhisaññojanāvijjāsaññojanehi ca sīlabbataparāmāsaavijjāsaññojanehi ca avijjāsaññojanamatteneva ca saddhinti evaṃ catudhā ekato uppajjati. Paṭigho pana issāsaññojanaavijjāsaññojanehi ceva macchariyasaññojanaavijjāsaññojanehi ca avijjāsaññojanamatteneva ca saddhinti evaṃ tidhā ekato uppajjati. Māno tāva bhavarāgāvijjāsaññojanehi saddhiṃ ekadhāva ekato uppajjati. Tathā vicikicchā. Sā hi avijjāsaññojanena saddhiṃ ekadhā uppajjati. Bhavarāgepi eseva nayo. Evamettha dve tīṇi saññojanāni ekato uppajjanti.