[๕๙๕] กตมนฺตํ รูปํ อชฺฌตฺติกํ นวิญฺญตฺติ จกฺขายตนํ ฯเปฯ กายายตนํ อิทนฺตํ รูปํ อชฺฌตฺติกํ นวิญฺญตฺติ ฯ กตมนฺตํ รูปํ พาหิรํ วิญฺญตฺติ กายวิญฺญตฺติ วจีวิญฺญตฺติ อิทนฺตํ รูปํ พาหิรํ วิญฺญตฺติ ฯ กตมนฺตํ รูปํ พาหิรํ นวิญฺญตฺติ รูปายตนํ ฯเปฯ กพฬึกาโร อาหาโร อิทนฺตํ รูปํ พาหิรํ นวิญฺญตฺติ ฯ

[๕๙๖] กตมนฺตํ รูปํ อชฺฌตฺติกํ นจิตฺตสมุฏฺฐานํ จกฺขายตนํ ฯเปฯ กายายตนํ อิทนฺตํ รูปํ อชฺฌตฺติกํ นจิตฺตสมุฏฺฐานํ ฯ กตมนฺตํ รูปํ พาหิรํ จิตฺตสมุฏฺฐานํ กายวิญฺญตฺติ วจีวิญฺญตฺติ ยํ วา ปนญฺญมฺปิ อตฺถิ รูปํ จิตฺตชํ จิตฺตเหตุกํ จิตฺตสมุฏฺฐานํ รูปายตนํ สทฺทายตนํ คนฺธายตนํ รสายตนํ โผฏฺฐพฺพายตนํ อากาสธาตุ อาโปธาตุ รูปสฺส ลหุตา รูปสฺส มุทุตา รูปสฺส กมฺมญฺญตา รูปสฺส อุปจโย รูปสฺส สนฺตติ กพฬึกาโร อาหาโร อิทนฺตํ รูปํ พาหิรํ จิตฺตสมุฏฺฐานํ ฯ กตมนฺตํ รูปํ พาหิรํ นจิตฺตสมุฏฺฐานํ อิตฺถินฺทฺริยํ ปุริสินฺทฺริยํ ชีวิตินฺทฺริยํ รูปสฺส ชรตา รูปสฺส อนิจฺจตา ยํ วา ปนญฺญมฺปิ อตฺถิ รูปํ น จิตฺตชํ น จิตฺตเหตุกํ น จิตฺตสมุฏฺฐานํ รูปายตนํ สทฺทายตนํ คนฺธายตนํ รสายตนํ โผฏฺฐพฺพายตนํ อากาสธาตุ อาโปธาตุ รูปสฺส ลหุตา รูปสฺส มุทุตา รูปสฺส กมฺมญฺญตา รูปสฺส อุปจโย รูปสฺส สนฺตติ กพฬึกาโร อาหาโร อิทนฺตํ รูปํ พาหิรํ นจิตฺตสมุฏฺฐานํ ฯ

[๕๙๗] กตมนฺตํ รูปํ อชฺฌตฺติกํ นจิตฺตสหภุ จกฺขายตนํ ฯเปฯ กายายตนํ อิทนฺตํ รูปํ อชฺฌตฺติกํ นจิตฺตสหภุ ฯ กตมนฺตํ รูปํ พาหิรํ จิตฺตสหภุ กายวิญฺญตฺติ วจีวิญฺญตฺติ อิทนฺตํ รูปํ พาหิรํ จิตฺตสหภุ ฯ กตมนฺตํ รูปํ พาหิรํ นจิตฺตสหภุ รูปายตนํ ฯเปฯ กพฬึกาโร อาหาโร อิทนฺตํ รูปํ พาหิรํ นจิตฺตสหภุ ฯ

[๕๙๘] กตมนฺตํ รูปํ อชฺฌตฺติกํ นจิตฺตานุปริวตฺติ จกฺขายตนํ ฯเปฯ กายายตนํ อิทนฺตํ รูปํ อชฺฌตฺติกํ นจิตฺตานุปริวตฺติ ฯ กตมนฺตํ รูปํ พาหิรํ จิตฺตานุปริวตฺติ กายวิญฺญตฺติ วจีวิญฺญตฺติ อิทนฺตํ รูปํ พาหิรํ จิตฺตานุปริวตฺติ ฯ กตมนฺตํ รูปํ พาหิรํ นจิตฺตานุปริวตฺติ รูปายตนํ ฯเปฯ กพฬึกาโร อาหาโร อิทนฺตํ รูปํ พาหิรํ นจิตฺตานุปริวตฺติ ฯ