[๖๓๑] กตมนฺตํ รูปํ อชฺฌตฺติกํ รูปสฺส นชรตา จกฺขายตนํ ฯเปฯ กายายตนํ อิทนฺตํ รูปํ รูปสฺส นชรตา ฯ กตมนฺตํ รูปํ พาหิรํ รูปสฺส ชรตา ยา รูปสฺส ชรา ชีรณตา ขณฺฑิจฺจํ ปาลิจฺจํ วลิตฺตจตา อายุโน สํหานิ อินฺทฺริยานํ ปริปาโก อิทนฺตํ รูปํ พาหิรํ รูปสฺส ชรตา ฯ กตมนฺตํ รูปํ พาหิรํ รูปสฺส นชรตา รูปายตนํ ฯเปฯ กพฬึกาโร อาหาโร อิทนฺตํ รูปํ พาหิรํ รูปสฺส นชรตา ฯ

[๖๓๒] กตมนฺตํ รูปํ อชฺฌตฺติกํ รูปสฺส นอนิจฺจตา จกฺขายตนํ ฯเปฯ กายายตนํ อิทนฺตํ รูปํ อชฺฌตฺติกํ รูปสฺส นอนิจฺจตา ฯ กตมนฺตํ รูปํ พาหิรํ รูปสฺส อนิจฺจตา โย รูปสฺส ขโย วโย เภโท ปริเภโท อนิจฺจตา อนฺตรธานํ อิทนฺตํ รูปํ พาหิรํ รูปสฺส อนิจฺจตา ฯ กตมนฺตํ รูปํ พาหิรํ รูปสฺส นอนิจฺจตา รูปายตนํ ฯเปฯ กพฬึกาโร อาหาโร อิทนฺตํ รูปํ พาหิรํ รูปสฺส นอนิจฺจตา ฯ

[๖๓๓] กตมนฺตํ รูปํ อชฺฌตฺติกํ น กพฬึกาโร อาหาโร จกฺขายตนํ ฯเปฯ กายายตนํ อิทนฺตํ รูปํ อชฺฌตฺติกํ น กพฬึกาโร อาหาโร ฯ กตมนฺตํ รูปํ พาหิรํ กพฬึกาโร อาหาโร โอทโน กุมฺมาโส สตฺตุ มจฺโฉ มํสํ ขีรํ ทธิ สปฺปิ นวนีตํ เตลํ มธุ ผาณิตํ ยํ วา ปนญฺญมฺปิ อตฺถิ รูปํ ยมฺหิ ยมฺหิ ชนปเท เตสํ เตสํ สตฺตานํ มุขาสิยํ ทนฺตวิขาทนํ คลชฺโฌหรณียํ กุจฺฉิวิตฺถมฺภนํ ยาย โอชาย สตฺตา ยาเปนฺติ อิทนฺตํ รูปํ พาหิรํ กพฬึกาโร อาหาโร ฯ กตมนฺตํ รูปํ พาหิรํ น กพฬึกาโร อาหาโร รูปายตนํ ฯเปฯ รูปสฺส อนิจฺจตา อิทนฺตํ รูปํ พาหิรํ น กพฬึกาโร อาหาโร ฯ เอวํ ติวิเธน รูปสงฺคโห ฯ ติกนิทฺเทโส ฯ