TIPITAKA Volume 34 : PALI ROMAN Abhidhamma Pitaka Vol 1 : Abhi. Dhammasaṅgaṇi

[99] Tasmiṃ kho pana samaye dhammā honti khandhā honti āyatanāni honti dhātuyo honti āhārā honti indriyāni honti jhānaṃ hoti maggo hoti balāni honti hetū honti phasso hoti vedanā hoti saññā hoti cetanā hoti cittaṃ hoti vedanākkhandho hoti saññākkhandho hoti saṅkhārakkhandho hoti viññāṇakkhandho hoti manāyatanaṃ hoti manindriyaṃ hoti manoviññāṇadhātu hoti dhammāyatanaṃ hoti dhammadhātu hoti ye vā pana tasmiṃ samaye aññepi atthi paṭiccasamuppannā arūpino dhammā ime dhammā kusalā.