TIPITAKA Volume 34 : PALI ROMAN Abhidhamma Pitaka Vol 1 : Abhi. Dhammasaṅgaṇi

[962] Katame dhammā kilesā dasa kilesavatthūni lobho doso moho māno diṭṭhi vicikicchā thīnaṃ uddhaccaṃ ahirikaṃ anottappaṃ lobho aṭṭhasu lobhasahagatesu cittuppādesu uppajjati doso dvīsu domanassasahagatesu cittuppādesu uppajjati moho sabbākusalesu uppajjati māno catūsu diṭṭhigatavippayuttalobhasahagatesu cittuppādesu uppajjati diṭṭhi catūsu diṭṭhigatasampayuttesu cittuppādesu uppajjati vicikicchā vicikicchāsahagatesu cittuppādesu uppajjati thīnaṃ sasaṅkhārikesu akusalesu uppajjati uddhaccañca ahirikañca anottappañca sabbākusalesu uppajjanti ime dhammā kilesā . Katame dhammā nokilesā ṭhapetvā kilese avasesaṃ akusalaṃ catūsu bhūmīsu kusalaṃ catūsu bhūmīsu vipāko tīsu bhūmīsu kiriyābyākataṃ rūpañca nibbānañca ime dhammā nokilesā.