๓. ปญฺหาปุจฺฉกวณฺณนา

[๑๖๘] อิธาปิ ปญฺหาปุจฺฉเก ยํ ลพฺภติ, ยญฺจ น ลพฺภติ, ตํ สพฺพํ ปุจฺฉิตฺวา ลพฺภมานวเสเนว วิสฺสชฺชนํ วุตฺตํ. น เกวลญฺจ อิธ, สพฺเพสุปิ ปญฺหาปุจฺฉเกสุ เอเสว นโย. อิธ ปน ทสนฺนํ อายตนานํ รูปภาเวน อพฺยากตตา เวทิตพฺพา. ทฺวินฺนํ อายตนานํ ขนฺธวิภงฺเค จตุนฺนํ ขนฺธานํ วิย กุสลาทิภาโว เวทิตพฺโพ. เกวลญฺหิ จตฺตาโร ขนฺธา สปฺปจฺจยาว สงฺขตาว, ธมฺมายตนํ ปน "สิยา อปฺปจฺจยํ สิยา อสงฺขตนฺ"ติ อาคตํ. อารมฺมณตฺติเกสุ จ อนารมฺมณํ สุขุมรูปสงฺขาตํ ธมฺมายตนํ น วตฺตพฺพโกฏฺฐาสํ ภชติ. ตญฺจ โข อนารมฺมณตฺตา, น ปริตฺตาทิภาเวน นวตฺตพฺพธมฺมารมฺมณตฺตาติ อยเมตฺถ วิเสโส. เสสํ ตาทิสเมว. อิธาปิ หิ จตฺตาโร ขนฺธา วิย ทฺวายตนานิ ๑- ปญฺจปญฺญาส กามาวจรธมฺเม อารพฺภ รชฺชนฺตสฺส ทุสฺสนฺตสฺส มุยฺหนฺตสฺส สํวรนฺตสฺส สมฺมสนฺตสฺส ปจฺจเวกฺขนฺตสฺส จ ปริตฺตารมฺมณานีติ ๒- สพฺพํ ขนฺเธสุ วุตฺตสทิสเมวาติ.

ปญฺหาปุจฺฉกวณฺณนา นิฏฺฐิตา

สมฺโมหวิโนทนิยา วิภงฺคฏฺฐกถาย