วิตุชฺชมานธมฺมานํ ๑- โหติ ทุกฺขํ สรีรชํ

อสยฺหมปฺปฏิการํ ทุกฺขสฺเสตสฺสิทํ ยโต

มรณํ วตฺถุ เตเนตํ ทุกฺขมิจฺเจว ภาสิตนฺ"ติ.

อปิจ อิมานิ ชาติชรามรณานิ นาม อิเมสํ สตฺตานํ วธกปจฺจามิตฺตา วิย โอตารํ คเวสนฺตานิ วิจรนฺติ. ยถา หิ ปุริสสฺส ตีสุ ปจฺจามิตฺเตสุ โอตาราเปกฺเขสุ วิจรนฺเตสุ เอโก วเทยฺย "อหํ อสุกอรญฺญสฺส นาม วณฺณํ กเถตฺวา เอตํ อาทาย ตตฺถ คมิสฺสามิ, เอตฺถ มยฺหํ ทุกฺกรํ นตฺถี"ติ. ทุติโย วเทยฺย "อหํ ตว เอตํ คเหตฺวา คตกาเล โปเถตฺวา ทุพฺพลํ กริสฺสามิ, เอตฺถ มยฺหํ ทุกฺกรํ นตฺถี"ติ. ตติโย วเทยฺย "ตยา เอตสฺมึ โปเถตฺวา ทุพฺพเล กเต ติเณฺหน อสินา สีสจฺเฉทนํ นาม มยฺหํ ภาโร โหตู"ติ เต เอวํ วตฺวา ตถา กเรยฺยุํ.