ตตฺถ สิยา:- กถํ ปเนตํ ชานิตพฺพํ "ปฏิสนฺธิยํ นามรูปํ วิญฺญาณปจฺจโย โหตี"ติ. สุตฺตโต ยุตฺติโต จ. สุตฺเต หิ "จิตฺตานุปริวตฺติโน ธมฺมา"ติอาทินา ๒- นเยน พหุธา เวทนาทีนํ วิญฺญาณปจฺจยตา สิทฺธา. ยุตฺติโต ปน:-

จิตฺตเชน หิ รูเปน อิธ ทิฏฺเฐน สิชฺฌติ

อทิฏฺฐสฺสาปิ รูปสฺส วิญฺญาณํ ปจฺจโย อิติ.

จิตฺเต หิ ปสนฺเน วา อปฺปสนฺเน วา ตทนุรูปานิ รูปานิ อุปฺปชฺชมานานิ ทิฏฺฐานิ, ทิฏฺเฐน จ อทิฏฺฐสฺสานุมานํ โหตีติ อิมินา อิธ ทิฏฺเฐน จิตฺตชรูเปน อทิฏฺฐสฺสาปิ ปฏิสนฺธิรูปสฺส วิญฺญาณํ ปจฺจโย โหตีติ ชานิตพฺพเมตํ. กมฺมสมุฏฺฐานสฺสาปิ หิ ตสฺส จิตฺตสมุฏฺฐานสฺเสว วิญฺญาณปจฺจยตา ปฏฺฐาเน ๓- อาคตาติ. เอวํ ปจฺจยนยโตเปตฺถ วิญฺญาตพฺโพ วินิจฺฉโย.