นขาติ วีสติยา นขปตฺตานํ นามํ. เต สพฺเพปิ วณฺณโต เสตา. สณฺฐานโต มจฺฉสกลิกสณฺฐานา. ทิสโต ปาทนขา เหฏฺฐิมทิสาย ชาตา, หตฺถนขา อุปริมทิสายาติ ทฺวีสุ ทิสาสุ ชาตา. โอกาสโต องฺคุลีนํ อคฺคปิฏฺเฐสุ ปติฏฺฐิตา. ปริจฺเฉทโต ทฺวีสุ ทิสาสุ องฺคุลิโกฏิมํเสหิ, อนฺโต องฺคุลิปิฏฺฐิมํเสน, พหิ เจว อคฺเค จ อากาเสน, ติริยํ อญฺญมญฺเญน ปริจฺฉินฺนา. เทฺว นขา เอกโต นตฺถิ. อยํ เนสํ สภาคปริจฺเฉโท, วิสภาคปริจฺเฉโท ปน เกสสทิโสเยว.
ทนฺตาติ ปริปุณฺณทนฺตสฺส ทฺวตฺตึส ทนฺตฏฺฐิกานิ. เตปิ วณฺณโต เสตา. สณฺฐานโต อเนกสณฺฐานา. เตสญฺหิ เหฏฺฐิมาย ตาว ทนฺตปาลิยา มชฺเฌ จตฺตาโร ทนฺตา มตฺติกปิณฺเฑ ปฏิปาฏิยา ฐปิตอลาพุพีชสณฺฐานา. เตสํ อุโภสุ ปสฺเสสุ เอเกโก เอกมูลโก เอกโกฏิโก มลฺลิกมกุลสณฺฐาโน. ตโต เอเกโก ทฺวิมูลโก ทฺวิโกฏิโก ยานกอุปตฺถมฺภนิกสณฺฐาโน, ตโต เทฺว เทฺว ติมูลา ติโกฏิกา. ตโต เทฺว เทฺว จตุมูลา จตุโกฏิกาติ. อุปริมปาลิยาปิ เอเสว นโย. ทิสโต อุปริมทิสาย ชาตา. โอกาสโต ทฺวีสุ หนุกฏฺฐิเกสุ ปติฏฺฐิตา. ปริจฺเฉทโต เหฏฺฐา หนุกฏฺฐิเก ปติฏฺฐิเตน อตฺตโน มูลตเลน, อุปริ อากาเสน, ติริยํ อญฺญมญฺเญน ปริจฺฉินฺนา. เทฺว ทนฺตา เอกโต นตฺถิ. อยํ เนสํ สภาคปริจฺเฉโท, วิสภาคปริจฺเฉโท ปน เกสสทิโสเยว.
ตโจติ สกลสรีรํ เวเฐตฺวา ฐิตจมฺมํ. ตสฺส อุปริ กาฬสามปีตาทิวณฺณา ฉวิ นาเมสา ๑- สกลสรีรโตปิ สงฺกฑฺฒิยมานา พทรฏฺฐิมตฺตา โหติ. ตโจ ปน วณฺณโต เสโตเยว. โส จสฺส เสตภาโว อคฺคิชาลาภิฆาตปหรณปฺปหาราทีหิ วิทฺธํสิตาย ฉวิยา ปากโฏ โหติ. สณฺฐานโต สรีรสณฺฐาโนว โหติ. อยเมตฺถ สงฺเขโป.
วิตฺถารโต ปน ปาทงฺคุลิตโจ โกสการกโกสสณฺฐาโน, ปิฏฺฐิปาทตโจ ปุฏพนฺธอุปาหนสณฺฐาโน, ชงฺฆตโจ ภตฺตปุฏกตาลปณฺณสณฺฐาโน, อูรุตโจ ตณฺฑุลภริตทีฆถวิกสณฺฐาโน, อานิสทตโจ อุทกปูริตปฏปริสฺสาวนสณฺฐาโน, ปิฏฺฐิตโจ ผลโกนทฺธจมฺมสณฺฐาโน, กุจฺฉิตโจ วีณาโทณิโกนทฺธจมฺมสณฺฐาโน, อุรตโจ เยภุยฺเยน จตุรสฺสสณฺฐาโน, อุภยพาหุตโจ ตูณีโรนทฺธจมฺมสณฺฐาโน, ปิฏฺฐิหตฺถตโจ ขุรโกสกสณฺฐาโน ผลกตฺถวิกสณฺฐาโน วา, หตฺถงฺคุลิตโจ กุญฺจิกาโกสกสณฺฐาโน, คีวตโจ คลกญฺจุกสณฺฐาโน, มุขตโจ ฉิทฺทาวฉิทฺโท กีฏกุลาวกสณฺฐาโน, สีสตโจ ปตฺตตฺถวิกสณฺฐาโนติ.