นยา ปเนตฺถ คเณตพฺพา. สตฺตนฺนมฺปิ หิ โพชฺฌงฺคานํ เอกโต ปุจฺฉิตฺวา วิสฺสชฺชเน เอเกกมคฺเค นยสหสฺสํ นยสหสฺสนฺติ จตฺตาริ นยสหสฺสานิ วิภตฺตานิ. ปาฏิเยกฺกํ ปุจฺฉิตฺวา วิสฺสชฺชเน เอเกกโพชฺฌงฺควเสน จตฺตาริ จตฺตารีติ สตฺต จตุกฺกา อฏฺฐวีสติ. ตานิ ปุริเมหิ จตูหิ สทฺธึ ทฺวตฺตึสาติ สพฺพานิปิ อภิธมฺมภาชนีเย ทฺวตฺตึส นยสหสฺสานิ วิภตฺตานิ กุสลาเนว. ยสฺมา ปน ผลกฺขเณปิ โพชฺฌงฺคา ลพฺภนฺติ, กุสลเหตุกานิ จ สามญฺญผลานิ, ตสฺมา เตสุปิ โพชฺฌงฺคทสฺสนตฺถํ กุสลนิทฺเทสปุพฺพงฺคมายเอว ตนฺติยา วิปากนโย อารทฺโธ. โสปิ เอกโต ปุจฺฉิตฺวา วิสฺสชฺชนสฺส จ ปาฏิเยกฺกํ ปุจฺฉิตฺวา วิสฺสชฺชนสฺส จ วเสน ทุวิโธ โหติ. เสสเมตฺถ เหฏฺฐา วุตฺตนเยเนว เวทิตพฺพํ. วิปาเก ปน กุสลโต ติคุณา นยา กาตพฺพาติ.

อภิธมฺมภาชนียวณฺณนา นิฏฺฐิตา.