ปรโต สุตฺวา ปฏิลภตีติ เอตฺถ กมฺมายตนาทีนิ ปเรน กริยมานานิ วา กตานิ วา ทิสฺวาปิ ยสฺส กสฺสจิ กถยมานสฺส วจนํ สุตฺวาปิ อาจริยสนฺติเก อุคฺคเหตฺวาปิ ปฏิลทฺธา สพฺพา ปรโต สุตฺวาเยว ปฏิลทฺธา นามาติ เวทิตพฺพา.
สมาปนฺนสฺสาติ สมาปตฺติสมงฺคิสฺส, อนฺโตสมาปตฺติยํ ปวตฺตา ปญฺญา ภาวนามยา นามาตฺยตฺโถ.
[๗๖๙] ทานํ อารพฺภาติ ทานํ ปฏิจฺจ, ทานเจตนาปจฺจยาตฺยตฺโถ. ทานาธิคจฺฉาติ ทานํ อธิคจฺฉนฺตสฺส, ปาปุณนฺตสฺสาติ อตฺโถ. ยา อุปฺปชฺชตีติ ยา เอวํ ทานเจตนาสมฺปยุตฺตา ปญฺญา อุปฺปชฺชติ, อยํ ทานมยา ปญฺญา นาม. สา ปเนสา "ทานํ ทสฺสามี"ติ จินฺเตนฺตสฺส, ทานํ ททนฺตสฺส, ทานํ ทตฺวา ตํ ปจฺจเวกฺขนฺตสฺส ปุพฺพเจตนา มุญฺจนเจตนา อปรเจตนาติ ติวิเธน อุปฺปชฺชติ.
สีลํ อารพฺภ สีลาธิคจฺฉาติ อิธาปิ สีลเจตนาสมฺปยุตฺตาว สีลมยา ปญฺญาติ อธิปฺเปตา. อยมฺปิ "สีลํ ปูเรสฺสามี"ติ จินฺเตนฺตสฺส สีลํ ปูเรนฺตสฺส สีลํ ปูเรตฺวา ตํ ปจฺจเวกฺขนฺตสฺส ปุพฺพเจตนา มุญฺจนเจตนา อปรเจตนาติ ติวิเธเนว อุปฺปชฺชติ. ภาวนามยา เหฏฺฐา วุตฺตาเยว.