ตถา วิปสฺสนํ ปฏฺฐเปนฺเตสุเยว "เยน นีหาเรน วิปสฺสนา อารทฺธา, เอส อรหตฺตํ ปาปุณิสฺสติ, เอส อรหตฺตํ ปตฺตุํ น สกฺขิสฺสติ, เอส อนาคามีเยว ภวิสฺสติ, เอส สกทาคามีเยว, เอส โสตาปนฺโนเยว, เอส ปน มคฺคํ วา ผลํ วา สจฺฉิกาตุํ น สกฺขิสฺสติ, ลกฺขณารมฺมณาย วิปสฺสนายเมว ฐสฺสติ, เอส ปจฺจยปริคฺคเหเยว ฐสฺสติ, เอส นามรูปปริคฺคเหเยว ฐสฺสติ, เอส อรูปปริคฺคเหเยว ฐสฺสติ, เอส รูปปริคฺคเหเยว ฐสฺสติ, เอส มหาภูตมตฺตเมว ววตฺถเปสฺสติ, เอส กิญฺจิ สลฺลกฺเขตุํ น สกฺขิสฺสตี"ติ ปชานาติ.

กสิณปริกมฺมํ กโรนฺเตสุปิ "เอตสฺส ปริกมฺมมตฺตเมว ภวิสฺสติ, นิมิตฺตํ อุปฺปาเทตุํ น สกฺขิสฺสติ, เอส ปน นิมิตฺตํ อุปฺปาเทตุํ สกฺขิสฺสติ, อปฺปนํ ปาเปตุํ น สกฺขิสฺสติ. เอส อปฺปนํ ปาเปตฺวา ฌานํ ปาทกํ กตฺวา วิปสฺสนํ ปฏฺฐเปตฺวา อรหตฺตํ คณฺหิสฺสตี"ติ ปชานาตีติ.

ตติยพลนิทฺเทสวณฺณนา.