@๓ ฉ.ม. เอวมฺเปตฺถ

อิทานิ เตสํ วิปสฺสิตพฺพาการํ ทสฺเสตุํ จกฺขุํ อนิจฺจนฺติอาทิ อารทฺธํ. ตตฺถ จกฺขุ ตาว หุตฺวา อภาวฏฺเฐน อนิจฺจนฺติ เวทิตพฺพํ. อปเรหิปิ จตูหิ การเณหิ อนิจฺจํ อุปฺปาทวยวนฺตโต วิปริณามโต ตาวกาลิกโต นิจฺจปฏิกฺเขปโตติ.

ตเทว ปฏิปีฬนฏฺเฐน ทุกฺขํ. ยสฺมา วา เอตํ อุปฺปนฺนํ ฐิตึ ปาปุณาติ, ฐิติยํ ชราย กิลมติ, ชรํ ปตฺวา อวสฺสํ ภิชฺชติ, ตสฺมา อภิณฺหสมฺปฏิปีฬนโต ทุกฺขมโต ทุกฺขวตฺถุโต สุขปฏิกฺเขปโตติ อิเมหิ จตูหิ การเณหิ ทุกฺขํ.

อวสวตฺตนฏฺเฐน ปน อนตฺตา. ยสฺมา วา เอตํ อุปฺปนฺนํ ฐิตึ มา ปาปุณาตุ, ฐานปฺปตฺตํ มา ชิรตุ, ชรปฺปตฺตํ มา ภิชฺชตูติ อิเมสุ ตีสุ ฐาเนสุ กสฺสจิ วสวตฺติภาโว นตฺถิ, สุญฺญํ เตน วสวตฺตนากาเรน. ตสฺมา สุญฺญโต อสฺสามิกโต อกามการิยโต อตฺตปฏิกฺเขปโตติ อิเมหิ จตูหิ การเณหิ อนตฺตา.