"อหํ ตรุโณ, อวเสสสตฺตานํ อตฺตภาโว ปปาเต ฐิตรุกฺขสทิโส, อหํ ปน ปฐมวเย ฐิโต"ติ มชฺชนวเสน อุปฺปนฺโน มาโน โยพฺพนมโท นาม.
"อหํ จิรํ ชีวึ, จิรํ ชีวามิ, จิรํ ชีวิสฺสามิ. สุขํ ชีวึ, สุขํ ชีวามิ, สุขํ ชีวิสฺสามี"ติ มชฺชนวเสน อุปฺปนฺโน มาโน ชีวิตมโท นาม.
"อหํ ลาภี, อวเสสา สตฺตา อปฺปลาภา, มยฺหํ ปน ลาภสฺส ปมาณํ นตฺถี"ติ มชฺชนวเสน อุปฺปนฺโน มาโน ลาภมโท นาม.
"อวเสสา สตฺตา ยํ วา ตํ วา ลภนฺติ, อหํ ปน สุกตํ ปณีตํ จีวราทิปจฺจยํ ลภามี"ติ มชฺชนวเสน อุปฺปนฺโน มาโน สกฺการมโท นาม.