"อวเสสภิกฺขูนํ ปาทปิฏฺฐิยํ อกฺกมิตฺวา คจฺฉนฺตา มนุสฺสา อยํ สมโณติปิ น วนฺทนฺติ, มํ ปน ทิสฺวาว วนฺทนฺติ, ปาสาณจฺฉตฺตํ วิย ครุํ กตฺวา อคฺคิกฺขนฺธํ วิย จ ทุราสทํ กตฺวา มญฺญนฺตี"ติ มชฺชนวเสน อุปฺปนฺโน มาโน ครุการมโท นาม.

"อุปฺปนฺโน ปโญฺห มยฺหเมว มุเขน ฉิชฺชติ, ภิกฺขาจารํ คจฺฉนฺตาปิ มเมว ปุรโต กตฺวา ปริวาเรตฺวา คจฺฉนฺตี"ติ มชฺชนวเสน อุปฺปนฺโน มาโน ปุเรกฺขารมโท นาม.

อาคาริกสฺส ตาว มหาปริวารสฺส "ปุริสสตมฺปิ ปุริสสหสฺสมฺปิ มํ ปริวาเรตี"ติ, อนาคาริกสฺส ปน "สมณสตมฺปิ สมณสหสฺสมฺปิ มํ ปริวาเรติ, เสสา อปฺปปริวารา, อหํ มหาปริวาโร เจว สุจิปริวาโร จา"ติ มชฺชนวเสน อุปฺปนฺโน มาโน ปริวารมโท นาม.