[๘๔๕] อิมินา เอตฺตเกน ฐาเนน สวตฺถุกํ มานํ กเถตฺวา อิทานิ อวตฺถุกํ นิพฺพตฺติตมานเมว ทสฺเสนฺโต ตตฺถ กตโม มโทติอาทิมาห. ตํ อุตฺตานตฺถเมว.

[๘๔๖] ปมาทนิทฺเทเส จิตฺตสฺส โวสฺสคฺโคติ อิเมสุ เอตฺตเกสุ ฐาเนสุ สติยา อนิคฺคณฺหิตฺวา จิตฺตสฺส โวสฺสชฺชนํ, สติวิรโหติ อตฺโถ. โวสฺสคฺคานุปฺปทานนฺติ โวสฺสคฺคสฺส อนุปฺปทานํ, ปุนปฺปุนํ วิสฺสชฺชนนฺติ อตฺโถ. อสกฺกจฺจกิริยตาติ เอเตสํ ทานาทีนํ กุสลธมฺมานํ ภาวนาย ปุคฺคลสฺส วา เทยฺยธมฺมสฺส วา อสกฺกจฺจกรณวเสน อสกฺกจฺจกิริยา. สตตภาโว สาตจฺจํ, น สตตภาโว อสาตจฺจํ, น สาตจฺจกิริยตา อสาตจฺจกิริยตา. น อฏฺฐิตกรณํ อนฏฺฐิตกิริยตา. ยถา นาม กกณฺฏโก โถกํ คนฺตฺวา โถกํ ติฏฺฐติ, น นิรนฺตรํ คจฺฉติ, เอวเมว โย ปุคฺคโล เอกทิวสํ ทานํ วา ทตฺวา ปูชํ วา กตฺวา ธมฺมํ วา สุตฺวา สมณธมฺมํ วา ปน ๑- กตฺวา ปุน จิรสฺสํ กโรติ, น นิรนฺตรํ ปวตฺเตติ, ตสฺส สา กิริยา อนฏฺฐิตกิริยตาติ วุจฺจติ. โอลีนวุตฺติตาติ นิรนฺตรํ กรณสงฺขาตสฺส วิปฺผารสฺเสว อภาเวน โอลีนวุตฺติตา. ๒- นิกฺขิตฺตฉนฺทตาติ กุสลกิริยาย วิริยฉนฺทสฺส นิกฺขิตฺตภาโว. นิกฺขิตฺตธุรตาติ วิริยธุรสฺส โอโรปนํ, โอสกฺกิตมานสตาติ อตฺโถ. อนธิฏฺฐานนฺติ กุสลกรเณ ปติฏฺฐาภาโว. อนนุโยโคติ อนนุยุญฺชนํ. ปมาโทติ ปมชฺชนํ. โย เอวรูโป ปมาโทติ อิทํ อตฺถปริยายสฺส พฺยญฺชนปริยายสฺส จ ปริยนฺตาภาวโต อาการทสฺสนํ, อิทํ วุตฺตํ โหติ:- ยฺวายํ อาทิโต ปฏฺฐาย ทสฺสิโต ปมาโท, โย อญฺโญปิ เอวมากาโร เอวํชาติโก ปมาโท ปมชฺชนาการวเสน ปมชฺชนา ปมชฺชิตภาววเสน ปมชฺชิตตฺตนฺติ สงฺขฺยํ คโต, อยํ วุจฺจติ ปมาโทติ. ลกฺขณโต ปเนส ปญฺจสุ กามคุเณสุ สติโวสฺสคฺคลกฺขโณ, ตตฺเถว สติยา วิสฺสฏฺฐากาโรติ เวทิตพฺโพ.