[๘๔๗] ถมฺภนิทฺเทเส ถทฺธฏฺเฐน ถมฺโภ. ขลิยา ถทฺธสาฏกสฺส ๑- วิย จิตฺตสฺส ถทฺธตา เอตฺถ กถิตา. ถมฺภนากาโร ถมฺภนา, ถมฺภิตสฺส ภาโว ถมฺภิตตฺตํ. กกฺขฬสฺส ปุคฺคลสฺส ภาโว กกฺขฬิยํ. ผรุสสฺส ปุคฺคลสฺส ภาโว ผารุสิยํ. อภิวาทนาทิสามีจิรหานํ ตสฺสา สามีจิยา อกรณวเสน อุชุเมว ฐปิตจิตฺตภาโว อุชุจิตฺตตา. ถทฺธสฺส อมุทุโน ภาโว อมุทุตา. อยํ วุจฺจตีติ อยํ ถมฺโภ นาม วุจฺจติ, เยน สมนฺนาคโต ปุคฺคโล คิลิตนงฺคลสีโส วิย อชคโร, วาตภริตา วิย ภสฺตา เจติยํ วา วุฑฺฒตเร วา ทิสฺวา โอนมิตุํ น สกฺโกติ, ปริยนฺเตเนว จรติ. สฺวายํ จิตฺตสฺส อุทฺธุมาตภาวลกฺขโณติ เวทิตพฺโพ.
[๘๔๘] สารมฺภนิทฺเทเส สารมฺภนวเสน สารมฺโภ. ปฏิปฺผริตฺวา สารมฺโภ ปฏิสารมฺโภ. สารมฺภนากาโร สารมฺภนา. ปฏิปฺผริตฺวา สารมฺภนา ปฏิสารมฺภนา. ปฏิสารมฺภิตสฺส ภาโว ปฏิสารมฺภิตตฺตํ. อยํ วุจฺจตีติ อยํ สารมฺโภ นาม วุจฺจติ. สฺวายํ ลกฺขณโต กรณุตฺตริยลกฺขโณติ วุจฺจติ, เยน สมนฺนาคโต ปุคฺคโล ตํ ทิคุณํ ตํ ทิคุณํ กโรติ. อาคาริโก สมาโน เอเกเนกสฺมึ ฆรวตฺถุสฺมึ สชฺชิเต อปโร เทฺว วตฺถูนิ สชฺเชติ, อปโร จตฺตาริ. อปโร อฏฺฐ, อปโร โสฬส. อนาคาริโก สมาโน เอเกเนกสฺมึ นิกาเย คหิเต "นาหํ เอตสฺส เหฏฺฐา ภวิสฺสามี"ติ อปโร เทฺว คณฺหาติ, อปโร ตโย, อปโร จตฺตาโร, อปโร ปญฺจ. สารมฺภวเสน หิ ตํ ๒- คณฺหิตุํ น วฏฺฏติ. อกุสลปกฺโข เอส นิรยคามิมคฺโค. กุสลปกฺขวเสน ปน เอกสฺมึ เอกํ สลากภตฺตํ เทนฺเต เทฺว ทาตุํ, เทฺว เทนฺเต จตฺตาริ ทาตุํ วฏฺฏติ. ภิกฺขุนาปิ ปเรน เอกสฺมึ นิกาเย คหิเต เทฺว นิกาเย คเหตฺวา สชฺฌายนฺตสฺส เม ผาสุ โหตีติ วิวฏฺฏปกฺเข ฐตฺวา ตทุตฺตรึ คณฺหิตุํ วฏฺฏติ.
[๘๔๙] อตฺริจฺฉตานิทฺเทเส ยถา อริยวํสสุตฺเต ๑- ลามกลามกฏฺโฐ อิตรีตรฏฺโฐ, เอวํ อคฺคเหตฺวา จีวราทีสุ ยํ ยํ ลทฺธํ โหติ, เตน เตน อสนฺตุฏฺฐสฺส, คิหิโน วา ปน รูปสทฺทคนฺธรสโผฏฺฐพฺเพสุ ยํ ยํ ลทฺธํ โหติ, เตน เตน อสนฺตุฏฺฐสฺส. ภิยฺโยกมฺยตาติ วิเสสกามตา. อิจฺฉนกวเสน อิจฺฉา. อิจฺฉาว อิจฺฉาคตา อิจฺฉนากาโร วา. อตฺตโน ลาภํ อติจฺจ อิจฺฉนภาโว อติจฺฉตา. ราโคติอาทีนิ เหฏฺฐา วุตฺตตฺถาเนว. อยํ วุจฺจตีติ อยํ อติจฺฉตา นาม วุจฺจติ. อตฺริจฺฉตาติปิ เอตสฺสาเอว นามํ. ลกฺขณโต ปน สกลาเภ อสนฺตุฏฺฐิ ปรลาเภ จ ปตฺถนา เอตํ อตฺริจฺฉตาลกฺขณํ. อตฺริจฺฉปุคฺคลสฺส หิ อตฺตนา ลทฺธํ ปณีตมฺปิ ลามกํ วิย ขายติ, ปเรน ลทฺธํ ลามกมฺปิ ปณีตํ วิย ขายติ, เอกภาชเน ปกฺกยาคุ วา ภตฺตํ วา ปูโว วา อตฺตโน ปตฺเต ปกฺขิตฺโต ลามโก วิย, ปรสฺส ปตฺเต ปณีโต วิย ขายติ. อยํ ปน อตฺริจฺฉตา ปพฺพชิตานมฺปิ โหติ คิหีนมฺปิ ติรจฺฉานคตานมฺปิ.