[๘๕๓] ตินฺติณนิทฺเทเส ตินฺติณนฺติ ขิยฺยนํ. ตินฺติณายนากาโร ตินฺติณายนา. ตินฺติเณน อยิตสฺส ตินฺติณสมงฺคิโน ภาโว ตินฺติณายิตตฺตํ. โลลุปภาโว โลลุปฺปํ. อิตเร เทฺว อาการภาวนิทฺเทสา. ปุจฺฉญฺชิกตาติ ลภนาลภนกฏฺฐาเน ๑- เวทนากมฺปนา นีจวุตฺติตา. สาธุกมฺยตาติ ปณีตปณีตานํ ปตฺถนา. เอวํ สพฺเพหิปิ ปเทหิ สุวานโทณิยํ กญฺชิยํ ปิวนกสุนขสฺส อญฺญํ สุนขํ ทิสฺวา ภุภุกฺกรณํ วิย "ตว สนฺตกํ, มม สนฺตกนฺ"ติ กิเลสวเสน ขียนากาโร กถิโต.
[๘๕๔] จาปลฺยนิทฺเทเส อาโกฏิตปจฺจาโกฏิตภาวาทีหิ จีวรสฺส มณฺฑนา จีวรมณฺฑนา. มณิวณฺณจฺฉวิกรณาทีหิ ปตฺตสฺส มณฺฑนา ปตฺตมณฺฑนา. จิตฺตกมฺมาทีหิ ปุคฺคลิกเสนาสนสฺส มณฺฑนา เสนาสนมณฺฑนา. อิมสฺส วา ปูติกายสฺสาติ อิมสฺส มนุสฺสสรีรสฺส. ยถา หิ ตทหุชาโตปิ สิงฺคาโล ชรสิงฺคาโลเตฺวว อูรุปฺปมาณาปิ จ คโฬจิลตา ปูติลตาเตฺวว สงฺขฺยํ คจฺฉติ, เอวํ สุวณฺณวณฺโณปิ มนุสฺสกาโย ปูติกาโยเตฺวว วุจฺจติ. ตสฺส อนฺตรนฺตรา รตฺตวณฺณปณฺฑุวณฺณาทีหิ นิวาสนปารุปนาทีหิ สชฺชนา มณฺฑนา นาม. พาหิรานํ วา ปริกฺขารานนฺติ ฐเปตฺวา ปตฺตจีวรํ เสสปริกฺขารานํ. อถวา ยา เอสา จีวรมณฺฑนา ปตฺตมณฺฑนาติ วุตฺตา, สา เตหิ วา ปริกฺขาเรหิ กายสฺส มณฺฑนา เตสํ วา พาหิรปริกฺขารานํ มณฺฑิตฺวา ฐปนวเสน มณฺฑนาติ เอวเมตฺถ อตฺโถ เวทิตพฺโพ. มณฺฑนา วิภูสนาติ เอตฺถ อูนฏฺฐานสฺส ปูรณวเสน มณฺฑนา, ฉวิราคาทิวเสน วิภูสนาติ เวทิตพฺพา. เกฬนาติ กีฬนา. ปริเกฬนาติ ปริกีฬนา. คิทฺธิกตาติ เคธยุตฺตตา. คิทฺธิกตฺตนฺติ ตสฺเสว เววจนํ. จปลภาโว จปลตา. ตถา จาปลฺยํ. อิทํ วุจจฺตีติ อิทํ จาปลฺยํ นาม วุจฺจติ, เยน สมนฺนาคโต ปุคฺคโล วสฺสสติโกปิ สมาโน ตทหุชาโต ทารโก วิย โหติ.
[๘๕๕] อสภาควุตฺตินิทฺเทเส วิปฺปฏิกูลคฺคาหิตาติ อนนุโลมคฺคาหิตา. วิปจฺจนีกสาตตาติ วิปจฺจนีเกน ปฏิวิรุทฺธกรเณน สุขายนา. อนาทรภาโว อนาทริยํ. ตถา อนาทริยตา. อคารวสฺส ภาโว อคารวตา. เชฏฺฐกภาวสฺส อกรณํ อปฺปติสฺสวตา. อยํ วุจฺจตีติ อยํ อสภาควุตฺติ นาม วุจฺจติ, วิสภาคชีวิกตาติ อตฺโถ, ยาย สมนฺนาคโต ปุคฺคโล มาตรํ วา ปิตรํ วา คิลานํ ปฏิวตฺติตฺวาปิ น โอโลเกติ, ปิตุ สนฺตกสฺส การณา มาตรา สทฺธึ, มาตุ สนฺตกสฺส การณา ปิตรา สทฺธึ กลหํ กโรติ, วิสภาคชีวิตํ ชีวติ, มาตาปิตูนํ สนฺตกสฺส การณา เชฏฺฐเกน วา กนิฏฺเฐน วา ภาตรา สทฺธึ กลหํ กโรติ, นิลฺลชฺชวจนํ วทติ, อาจริยสฺส วา อุปชฺฌายสฺส วา วตฺตปฏิวตฺตํ น กโรติ, คิลานํ น อุปฏฺฐาติ, พุทฺธสฺส ภควโต เจติยทสฺสนฏฺฐาเน อุจฺจารํ วา ปสฺสาวํ วา กโรติ, เขฬมฺปิ สิงฺฆาณิกมฺปิ ฉฑฺเฑติ, ฉตฺตํ ธาเรติ, อุปาหนา อารุยฺห คจฺฉติ, พุทฺธสาวเกสุ น ลชฺชติ, สํเฆ จิตฺตีการํ น กโรติ, มาติมตฺตปิติมตฺตาทีสุ ครุฏฺฐานิเยสุ หิโรตฺตปฺปํ น ปจฺจุปฏฺฐาเปติ. ตสฺเสวํ ปวตฺตมานสฺส สพฺพาเปสา กิริยาว มาตรีติอาทีสุปิ วตฺถูสุ อสภาควุตฺติตา นาม โหติ.