อกุสลํ กายกมฺมํ โหติ, "อโห สุขํ อโห สุขนฺ"ติ วาจํ ภินฺทิตฺวา อสฺสาทนกาเล วจีกมฺมํ, กายงฺควาจงฺคานิ อโจเปตฺวา มนสาว อสฺสาทนกาเล มโนกมฺมํ. อนฺตคฺคาหิกทิฏฺฐิวเสน ปน สพฺเพสมฺปิ ทิฏฺฐิคติกานํ จงฺกมนาทิวเสน ตานิ โหนฺติเยว.

[๙๒๐] วิธานิทฺเทเส "กถํวิธํ สีลวนฺตํ วทนฺติ, กถํวิธํ ปญฺญวนฺตํ วทนฺตี"ติอาทีสุ ๑- อาการสณฺฐานํ วิธา นาม. "เอกวิเธน ญาณวตฺถู"ติอาทีสุ ๒- โกฏฺฐาโส. "วิธาสุ น วิกมฺปตี"ติอาทีสุ ๓- มาโน. อิธาปิ มาโนว วิธา นาม.

[๙๒๑] ภยนิทฺเทเส ชาตึ ปฏิจฺจ ภยนฺติ ชาติปจฺจยา อุปฺปนฺนภยํ. ภยานกนฺติ อาการนิทฺเทโส. ฉมฺภิตตฺตนฺติ ภยวเสน คตฺตจลนํ. โลมหํโสติ โลมานํ หํสนํ อุทฺธคฺคภาโว. อิมินา ปททฺวเยน กิจฺจโต ภยํ ทสฺเสตฺวา ปุน เจตโส อุตฺราโสติ สภาวโต ทสฺสิตํ.