อาชีวกภยนฺติ อาชีวํ ชีวิตวุตฺตึ ปฏิจฺจ อุปฺปนฺนํ ภยํ, ตํ อาคาริกสฺสปิ โหติ อนาคาริกสฺสปิ. ตตฺถ อาคาริเกน ตาว อาชีวเหตุ พหุํ อกุสลํ กตํ โหติ. อถสฺส มรณสมเย นิรเย อุปฏฺฐหนฺเต ภยํ อุปฺปชฺชติ. อนาคาริเกนาปิ พหู อเนสนา กตา โหนฺติ. ๓- อถสฺส มรณกาเล นิรเย อุปฏฺฐหนฺเต ภยํ อุปฺปชฺชติ. อิทํ อาชีวกภยํ นาม. อสิโลกภยนฺติ ครหภยํ. ปริสสารชฺชภยนฺติ กตปาปสฺส ปุคฺคลสฺส สนฺนิปติตํ ปริสํ อุปสงฺกมนฺตสฺส สารชฺชสงฺขาตํ ภยํ อุปฺปชฺชติ. อิทํ ปริสสารชฺชภยํ นาม. อิตรทฺวยํ ปากฏเมว.

[๙๔๓] ทิฏฺฐธมฺมนิพฺพานวาเทสุ ๔- ปญฺจหิ กามคุเณหีติ มนาปิยรูปาทีหิ ปญฺจหิ กามโกฏฺฐาเสหิ พนฺธเนหิ วา. สมปฺปิโตติ สุฏฺฐุ อปฺปิโต อลฺลีโน หุตฺวา. สมงฺคีภูโตติ สมนฺนาคโต. ปริจาเรตีติ เตสุ กามคุเณสุ ยถาสุขํ อินฺทฺริยานิ จาเรติ สญฺจาเรติ อิโต จิโต จ อุปเนติ. อถวา ปน ลฬติ รมติ กีฬตีติ. เอตฺถ จ ทุวิธา กามคุณา มานุสฺสกา เจว ทิพฺพา จ. มานุสฺสกา มนฺธาตุกามคุณสทิสา ทฏฺฐพฺพา, ทิพฺพา ปรนิมฺมิตวสวตฺติเทวราชสฺส กามคุณสทิสาติ. เอวรูเป กาเม อุปคตญฺหิ เต ปรมทิฏฺฐธมฺมนิพฺพานปฺปตฺโต โหตีติ วทนฺติ. ตตฺถ ปรมทิฏฺฐธมฺมนิพฺพานนฺติ ปรมํ ทิฏฺฐธมฺมนิพฺพานํ, อุตฺตมนฺติ อตฺโถ.

@๓ ฉ.ม. โหติ ๔ ฉ.ม......วาเรสุ