Avijjāmūlakakusalaniddesavaṇṇanā

[334] Idāni aparenapi pariyāyena ekacittakkhaṇe paccayākāraṃ dassetuṃ puna katame dhammā kusalātiādimāraddhaṃ. Tattha avijjāpaccayāti upanissayapaccayataṃ sandhāya vuttaṃ. Teneva niddesavāre "tattha katamā avijjā"ti avibhajitvā "tattha katamo avijjāpaccayā saṅkhāro"ti vibhattaṃ. Kusalacetanāsaṅkhāto hi saṅkhāroyeva tasmiṃ samaye cittena sahajāto hoti, na avijjā.

Tattha lokiyakusalassa heṭṭhā suttantabhājanīye vuttanayeneva avijjā paccayo hoti. Yasmā ca appahīnāvijjo avijjāya pahānatthaṃ lokuttaraṃ bhāveti, tasmā tassāpi samatikkamavasena paccayo hoti. Avijjāvatoyeva hi kusalāyūhanaṃ hoti, na itarassa. Tattha tebhūmikakusale sammohavasenapi samatikkamabhāvanāvasenapi āyūhanaṃ labbhati, lokuttare samucchedabhāvanāvasenāti. Sesaṃ vuttanayameva.