Tato dukkhadvayassāpi vatthuto so mahesinā

dukkho vuttoti viññeyyo appiyehi samāgamoti.

Piyavippayoganiddesa

[200] Piyavippayoganiddeso vuttapaṭipakkhanayeneva veditabbo. Mātā vātiādi panettha atthakāme sarūpena dassetuṃ vuttaṃ. Tattha mamāyatīti mātā. Piyāyatīti pitā. Bhajatīti bhātā. Tathā bhaginī. Mettāyantīti mittā. Minantīti vā mittā, sabbaguyhesu anto pakkhipantīti attho. Kiccakaraṇīyesu sahabhāvaṭṭhena amā hontīti amaccā. Ayaṃ amhākaṃ ajjhattikoti evaṃ jānanti, ñāyanti vāti ñātī. Lohitena sambandhāti sālohitā. Evametāni padāni atthato veditabbāni. Ayaṃ vuccatīti ayaṃ piyehi vippayogo nāma kathiyati. So iṭṭhavatthuviyogalakkhaṇo, sokuppādanaraso, byāsanapaccupaṭṭhāno.