Kasmā panevaṃ desetīti. Paṭiccasamuppādassa samantabhaddakattā sayañca desanāvilāsappattattā. Samantabhaddako hi paṭiccasamuppādo tato tato ñāyapaṭivedhāya saṃvattatiyeva, desanāvilāsappatato ca bhagavā catuvesārajjapaṭisambhidāyogena catubbidhagambhīrabhāvappattiyā ca. So desanāvilāsappattattā nānānayeheva dhammaṃ deseti. Visesato panassa yā ādito paṭṭhāya anulomadesanā, sā pavattikāraṇavibhāgasammuḷhaṃ veneyyajanaṃ samanupassato yathāsakehi kāraṇehi pavattisandassanatthañca uppattikkamasandassanatthañca pavattitāti ñātabbā.
Yā pariyosānato paṭṭhāya paṭilomadesanā, sā "kicchaṃ vatāyaṃ loko āpanno jāyati ca jīyati ca mīyati cā"tiādinā nayena kicchāpannaṃ lokamanuvilokayato pubbabhāgapaṭivedhānusārena tassa tassa jarāmaraṇādikassa dukkhassa attanādhigatakāraṇasandassanatthaṃ. Yā pana majjhato paṭṭhāya yāva ādismā, sā āhāranidānavavatthāpanānusārena yāva atītaṃ addhānaṃ atiharitvā puna atītaddhato pabhūti hetuphalapaṭipāṭisandassanatthaṃ. Yā pana majjhato paṭṭhāya yāva pariyosānā pavattā, sā paccuppanne addhāne anāgataddhāhetusamuṭṭhānato pabhūti anāgataddhānasandassanatthaṃ. Tāsu yā sā pavattikāraṇasammuḷhassa veneyyajanassa yathāsakehi kāraṇehi pavattisandassanatthaṃ uppattikkamasandassanatthañca ādito paṭṭhāya anulomadesanā vuttā, sā idha nikkhittāti veditabbā.
Kasmā panettha avijjā ādito vuttā, kiṃ pakativādīnaṃ pakati viya avijjāpi akāraṇaṃ mūlakāraṇaṃ lokassāti. Na akāraṇaṃ. "āsavasamudayā avijjāsamudayo"ti hi avijjāya kāraṇaṃ vuttaṃ. Atthi pana pariyāyo, yena mūlakāraṇaṃ siyā, ko pana soti. Vaṭṭakathāya sīsabhāvo. Bhagavā hi vaṭṭakathaṃ kathento dve dhamme sīsaṃ katvā kathesi avijjaṃ vā bhavataṇhaṃ vā. Yathāha "purimā bhikkhave koṭi na paññāyati avijjāya `ito pubbe avijjā nāhosi, atha pacchā sambhavī'ti. Evañcetaṃ bhikkhave vuccati, atha ca pana paññāyati `idappaccayā avijjā"ti. Bhavataṇhaṃ vā. Yathāha "purimā bhikkhave koṭi na paññāyati bhavataṇhāya `ito pubbe bhavataṇhā nāhosi, atha pacchā sambhavī'ti. Evañcetaṃ bhikkhave vuccati, atha ca pana paññāyati `idappaccayā bhavataṇhā"ti.