Tattha yasmā ayaṃ avijjā dukkhasaccassa yāthāvasarasalakkhaṇaṃ jānituṃ passituṃ paṭivijjhituṃ na deti, chādetvā pariyonaddhitvā gaṇhitvā tiṭṭhati, tasmā "dukkhe aññāṇan"ti vuccati. Tathā yasmā dukkhasamudayassa, dukkhanirodhassa, dukkhanirodhagāminīpaṭipadāya yāthāvasarasalakkhaṇaṃ jānituṃ passituṃ paṭivijjhituṃ na deti, chādetvā pariyonaddhitvā gaṇhitvā tiṭṭhati, tasmā dukkhanirodhagāminiyā paṭipadāya aññāṇanti vuccati. Imesu catūsu ṭhānesu suttantikapariyāyena aññāṇaṃ avijjāti kathitaṃ.

Nikkhepakaṇḍe pana abhidhammapariyāyena "pubbante aññāṇan"ti aparesupi catūsu ṭhānesu aññāṇaṃ gahitaṃ. Tattha pubbantoti atīto addhā atītāni khandhadhātuāyatanāni. Aparantoti anāgato addhā anāgatāni khandhadhātuāyatanāni. Pubbantāparantoti tadubhayaṃ. Idappaccayatāti saṅkhārādīnaṃ kāraṇāni avijjādīni aṅgāni. Paṭiccasamuppannadhammāti avijjādīhi nibbattā saṅkhārādayo dhammā. Tatrāyaṃ avijjā yasmā atītānaṃ khandhādīnaṃ yāthāvasarasalakkhaṇaṃ jānituṃ passituṃ paṭivijjhituṃ na deti, chādetvā pariyonaddhitvā gaṇhitvā tiṭṭhati, tasmā "pubbante aññāṇan"ti vuccati. Tathā yasmā anāgatānaṃ khandhādīnaṃ .pe. Atītānāgatānaṃ khandhādīnaṃ .pe. Idappaccayatāya ceva paṭiccasamuppannadhammānañca yāthāvasarasalakkhaṇaṃ jānituṃ passituṃ paṭivijjhituṃ na deti, chādetvā pariyonaddhitvā gaṇhitvā tiṭṭhati, tasmā idappaccayatāpaṭiccasamuppannesu dhammesu aññāṇanti vuccati. Imesu aṭṭhasu ṭhānesu abhidhammapariyāyena aññāṇaṃ avijjāti kathitaṃ.

Evaṃ kiṃ kathitaṃ hoti? kiccato ceva jātito ca avijjā kathitā nāma Hoti. Kathaṃ? ayaṃ hi avijjā imāni aṭṭha ṭhānāni jānituṃ passituṃ paṭivijjhituṃ