Kathañca pana yo etesu vimuyhati, so tividhepete saṅkhāre karotīti ce. Cutiyā tāva vimuḷho sabbattha "khandhānaṃ bhedo maraṇan"ti cutiṃ agaṇhanto satto marati, sattassa desantarasaṅkamanantiādīni vikappeti. Upapāte vimuḷho sabbattha "khandhānaṃ pātubhāvo jātī"ti upapātaṃ agaṇhanto satto upapajjati, sattassa navasarīrapātubhāvotiādīni vikappeti. Saṃsāre vimuḷho yo esa:-

"khandhānañca paṭipāṭi dhātuāyatanāna ca

abbocchinnā vattamānā saṃsāroti pavuccatī"ti.

Evaṃ vaṇṇito saṃsāro, taṃ evaṃ agaṇhanto "ayaṃ satto asmā lokā paraṃ lokaṃ gacchati, parasmā lokā imaṃ lokaṃ āgacchatī"tiādīni vikappeti. Saṅkhārānaṃ lakkhaṇe vimuḷho saṅkhārānaṃ sabhāvalakkhaṇaṃ sāmaññalakkhaṇañca agaṇhanto saṅkhāre attato attaniyato dhuvato subhato sukhato ca vikappeti. Paṭiccasamuppannadhammesu vimuḷho avijjādīhi saṅkhārādīnaṃ pavattiṃ agaṇhanto "attā jānāti vā na jānāti vā, soeva karoti ca kāreti ca. So paṭisandhiyaṃ upapajjati, tassa aṇuissarādayo kalalādibhāvena sarīraṃ saṇṭhapetvā indriyāni