Tayidaṃ sabbampi evaṃ

pavattamānaṃ sandhimhi dvidhā kammena vattati

missādīhi ca bhedehi bhedassa duvidhādiko.

Idañhi ekūnavīsatividhampi vipākaviññāṇaṃ paṭisandhimhi pavattamānaṃ dvidhā kammena vattati. Yathāsakaṃ hi etassa janakaṃ kammaṃ nānākhaṇikakammapaccayena ceva upanissayapaccayena ca paccayo hoti. Vuttañhetaṃ "kusalākusalakammaṃ vipākassa upanissayapaccayena paccayo"ti. Evaṃ pavattamānassa panassa missādīhi bhedehi duvidhādikopi bhedo veditabbo. Seyyathīdaṃ: idañhi paṭisandhivasena ekadhā vattamānampi rūpena saha missāmissabhedato duvidhaṃ, kāmarūpārūpabhavabhedato tividhaṃ, aṇḍajajalābujasaṃsedajaopapātikayonivasena catubbidhaṃ, gativasena pañcavidhaṃ, viññāṇaṭṭhitivasena sattavidhaṃ, sattāvāsavasena aṭṭhavidhaṃ hoti. Tattha