Siyuṃ nidassanānettha paṭighosādikā atha

santānabandhato natthi ekatā nāpi nānatā.

Ettha cetassa viññāṇassa purimabhavato idha anāgamane atītabhavapariyāpannahetūhi ca uppāde paṭighosapadīpamuddāpaṭibimbappakārā dhammā nidassanāni siyuṃ. Yathā hi paṭighosapadīpamuddacchāyā saddādihetukā aññatra agantvā honti, evameva idaṃ cittaṃ. Ettha ca santānabandhato natthi, ekatā nāpi nānatā. Yadi hi santānabandhe sati ekantamekatā bhaveyya, na khīrato dadhi sambhūtaṃ siyā. Athāpi ekantanānatā bhaveyya, na khīrasāmīno dadhi siyā. Esa nayo sabbesu hetuhetusamuppannesu. Evañca sati sabbalokavohāralopo siyā. So ca aniṭṭho, tasmā ettha na ekantamekatā vā nānatā vā upagantabbāti.