Tattha siyā:- kathaṃ panetaṃ jānitabbaṃ "paṭisandhiyaṃ nāmarūpaṃ viññāṇapaccayo hotī"ti. Suttato yuttito ca. Sutte hi "cittānuparivattino dhammā"tiādinā nayena bahudhā vedanādīnaṃ viññāṇapaccayatā siddhā. Yuttito pana:-

cittajena hi rūpena idha diṭṭhena sijjhati

adiṭṭhassāpi rūpassa viññāṇaṃ paccayo iti.

Citte hi pasanne vā appasanne vā tadanurūpāni rūpāni uppajjamānāni diṭṭhāni, diṭṭhena ca adiṭṭhassānumānaṃ hotīti iminā idha diṭṭhena cittajarūpena adiṭṭhassāpi paṭisandhirūpassa viññāṇaṃ paccayo hotīti jānitabbametaṃ. Kammasamuṭṭhānassāpi hi tassa cittasamuṭṭhānasseva viññāṇapaccayatā paṭṭhāne āgatāti. Evaṃ paccayanayatopettha viññātabbo vinicchayo.