@4 khu.dha. 25/215/54 5 saṃ.kha. 17/1/3 6 ka. ciraṃ dīghamaddhānaṃ tiṭṭhanti

@7 saṃ.kha. 17/78/70, aṅ. catukka. 21/33/38 8 Ma.u. 14/246/214

@9 cha.Ma. ayaṃ pāṭho na dissati 10 cha.Ma. avijjāya hetubhūte

Evaṃ sati "avijjāpaccayā saṅkhārā"ti idaṃ ādimattakathanaṃ virujjhatīti ce. Nayidaṃ ādimattakathanaṃ, padhānadhammakathanaṃ panetaṃ. Tiṇṇañhi vaṭṭānaṃ avijjā padhānā. Avijjāggahaṇena hi avasesaṃ kilesavaṭṭañca kammādīni ca bālaṃ paliveṭhenti sappasiraggahaṇena sesaṃ sappasarīraṃ viya bāhaṃ. Avijjāsamucchede pana kate tehi vimokkho hoti sappasiracchede kate paliveṭhitabāhāvimokkho viya. Yathāha "avijjāyatveva asesavirāganirodhā saṅkhāranirodho"tiādi. Iti yaṃ gaṇhato bandho muñcato ca vimokkho hoti, tassa padhānadhammassa kathanamidaṃ, na ādimattakathananti evamidaṃ bhavacakkaṃ aviditādīti veditabbaṃ. Tayidaṃ yasmā avijjādīhi kāraṇehi saṅkhārādīnaṃ pavatti, tasmā tato aññena "brahmā mahābrahmā seṭṭho sajjitā"ti evaṃ parikappitena brahmādinā vā saṃsārassa kārakena "so kho pana me ayaṃ attā vado vadeyyo"ti evaṃ parikappitena attanā vā sukhadukkhānaṃ vedakena rahitaṃ. Iti kārakavedakarahitanti veditabbaṃ.