Kusalamūlakavipākaniddesavaṇṇanā

[343] Idāni abyākatesupi apareneva nayena paccayākāraṃ dassetuṃ katame dhammā abyākatātiādimāraddhaṃ. Tattha kusalamūlapaccayāti idampi upanissaya- paccayataṃ sandhāya vuttaṃ. Kusalavipākassa hi kusalamūlaṃ akusalavipākassa ca akusalamūlaṃ upanissayapaccayo hoti, nānākkhaṇikakammapaccaye pana vattabbameva natthi. Tasmā esa upanissayapaccayena ceva nānākkhaṇikakammapaccayena ca paccayo hoti. Teneva niddesavāre "tattha katamaṃ kusalamūlan"ti avibhajitvā "tattha katamo kusalamūlapaccayā saṅkhāro"ti vibhattaṃ. Akusalavipākepi eseva nayo.

Avijjāmūlakakusalaniddese viya ca imasmimpi vipākaniddese paṭhamaṃ paccayacatukkameva labbhati, tampi paṭhamavāraṃ dassetvā saṅkhittaṃ. Tasmā ekekasmiṃ vipākacitte ekamekasseva catukkassa vasena kusalamūlake akusalamūlake ca naye vārappabhedo veditabbo. Kiriyādhammānaṃ pana yasmā neva avijjā na